प्रधानमंत्री नरेन्द्र मोदीक विमानकेँ तकनीकी खराबीक कारण शुक्रदिन देवघर हवाई अड्डा पर रोकल गेल। प्रधानमंत्री नरेन्द्र मोदी शुक्रदिन बिहारक जमुईमे भगवान बिरसा मुण्डाक १५०म जयंती समारोहमे भाग लेलनि। हुनकर विमान देवघर हवाई अड्डा पर उतरल आ ओकर बाद ओ हेलीकॉप्टरसँ जमुई पहुँचलाह।
कार्यक्रममे भाग लेलाक बाद हुनका देवघर हवाई अड्डासँ दिल्ली घुरबाक कार्यक्रम छल, मुदा तकनीकी समस्याक कारण हुनकर उड़ान नहि उड़ि सकल। एतय प्रधानमंत्रीक यात्राक लेल देवघरकेँ नो फ्लाई जोन घोषित करबाक कारणेँ शुक्रदिन झारखण्ड पहुँचल कांग्रेस नेता राहुल गाँधी आ झामुमोक स्टार प्रचारक कल्पना सोरेनक उड़ान सेहो रोकि देल गेल।
राहुल गाँधी एकटा चुनावी सभाकेँ सम्बोधित करबाक लेल गोड्डा जिला पहुँचलाह। बैसारक बाद जखनि ओ वापसीक लेल हेलीकॉप्टरमे चढ़लाह तखनि हुनक हेलीकॉप्टर केर उड़बाक अनुमति नहि देल गेल। बहुत समय धरि हुनकर हेलीकॉप्टर मेहरामामे ठाढ़ रहल। कांग्रेस कार्यकर्ता सभ एहि पर भयंकर हंगामा कयलनि। महगामाक विधायक आ कांग्रेसक उम्मीदवार दीपिका पाण्डेय सिंह कहलनि जे प्रधानमंत्री एहि लेल देवघरमे छथि ताकि राहुल गाँधीकेँ ओहि क्षेत्रसँ गुजरबाक अनुमति नहि भेटय। प्रोटोकॉल अछि, जकरा हम बुझैत छी, मुदा कांग्रेस ७० साल धरि देश पर शासन कयलक आ एहेन घटना कोनो विपक्षी नेताक संग कहियो नहि भेल छल। ई स्वीकार्य नहि अछि।
तहिना देवघर विधानसभा लेल सोनवा डंगाल (रिखिया) मे आयोजित इंडिया एलायंसक जनसभामे गांडेय विधायक झामुमोक स्टार प्रचारक कल्पना सोरेन समय पर नहि पहुँचि सकलीह। कहल गेल जे प्रधानमंत्रीक विमान देवघर हवाई अड्डा पर होयबाक कारणे नो फ्लाई जोन घोषित कयल गेल अछि आ एहि कारणेँ हेलीकॉप्टरकेँ उड़बाक अनुमति नहि देल गेल।
