बिहारक मुख्यमंत्री नीतीश कुमार चुनावसँ पहिने घोषणाक झड़ी लगा देलनि। सीएम नीतीश बिहारमे शिक्षक बहालीक संबंधमे एकटा पैघ घोषणा कयलनि अछि। ओ कहलनि अछि जे आब बहालीमे स्थानीय लोककेँ प्राथमिकता भेटत।
आब बिहारमे विधानसभा चुनावक तारीख जल्दिये घोषित हेबाक उम्मीद अछि। चुनावसँ पहिने सभ राजनीतिक दल अपन चुनावी तैयारीमे व्यस्त अछि। दोसर दिसि चुनावसँ पहिने बिहारक मुख्यमंत्री नीतीश कुमार बिहारक जनता लेल एकक बाद एक घोषणा कय रहल छथि। मुफ्त बिजली, महिला आरक्षण, युवा आयोगक गठन, कर्मचारीक मानदेय राशिमे बढ़ोतरी जेहन फैसलाक बाद सीएम नीतीश एकटा आओर घोषणा कयलनि। सीएम नीतीश कुमार सोमदिन घोषणा कयलनि अछि जे आब बिहारमे शिक्षक बहालीमे स्थानीय लोककेँ प्राथमिकता देल जाएत।
बिहारक सीएम नीतीश कुमार एक्स- पर अपन ट्वीटमे कहलनि जे, नवम्बर 2005 मे सरकारक गठनक बादसँ हम सब शिक्षा व्यवस्थाकेँ बेहतर बनेबाक लेल लगातार काज कय रहल छी। शिक्षा व्यवस्थाकेँ मजबूत करय लेल भारी संख्यामे शिक्षकक नियुक्ति कयल गेल अछि। शिक्षा विभागकेँ निर्देश देल गेल अछि जे ओ संबंधित नियममे आवश्यक संशोधन कय शिक्षकक बहालीमे डोमिसाइल नीति अर्थात बिहारक निवासीकेँ प्राथमिकता देल जाय। एकरा लागू कयल जायत।”
ई टीआरई-4 सँ शुरू होएत, टीआरई-4 वर्ष 2025 मे आ टीआरई-5 वर्ष 2026 अर्थात सभमे लागू रहत। टीआरई-5 करयसँ पहिने एसटीईटी करय केर निर्देश सेहो देल गेल अछि।”
बिहारमे विधानसभा चुनावक लेल सभ राजनीतिक दल तैयारी शुरू कय देलक अछि। चुनाव आयोग जल्दिये बिहारमे विधानसभा चुनावक तारीखक घोषणा कय सकैत अछि। आगामी अक्टूबर-नवंबरमे बिहार विधानसभा चुनावक संभावना अछि। ई चुनाव कुल 243 सीटक लेल होएत आओर बहुमतक लेल 122 सीटक जरूरत होएत।
