राज्यमे एक लाखसँ बेसी टीबीक मरीजकेँ एहि बीमारीसँ लड़बामे राहत भेटय लागल अछि। आब केंद्र सरकार बिहारक टीबी मरीजक लेल दवाईक खेप भेजब शुरू कऽ देलक अछि। एकर रोगीसभकेँ तीन मासक बदला मात्र एक पखवाड़ाक दबाई देल जा रहल अछि।
राज्यमे एक लाखसँ बेसी टीबीक मरीजकेँ एहि बीमारीसँ लड़बामे राहत भेटय लागल अछि। राज्यमे टीबीक मरीजक संख्या कम होयबाक कारणेँ अप्रैल, मई आ जून मासमे केन्द्र सरकारसँ कम मात्रामे दवाईक आपूर्ति कयल जा रहल छल।
स्वास्थ्य मंत्री मंगल पाण्डेय कहलनि जे राष्ट्रीय क्षयरोग उन्मूलन कार्यक्रम देशक सभ राज्यमे लागू कयल जाइत अछि। भारत सरकारक माध्यमसँ टीबीक रोगीसभक इलाजक लेल सभ प्रकारक दवाइ प्राप्त कराओल गेल अछि। किछु कारणसँ केन्द्रीय टीबी प्रभागसँ टीबीक दवाइ पठयबामे देरी भेल अछि।
एकरा देखैत राज्य सरकार स्थानीय स्तर पर बिहार मेडिकल सर्विसेज एंड इन्फ्रास्ट्रक्चर कॉर्पोरेशन लिमिटेड द्वारा १२ प्रकारक दवाइ सेहो अनुबंधित कयलक अछि। एकर अतिरिक्त, भारत सरकार द्वारा निर्धारित चारि प्रकारक विशिष्ट पैक (कॉम्बी पैक) आ पाँच प्रकारक अन्य टीबी उपचार दवाइकेँ आवश्यक दवाइसभक सूचीमे शामिल कयल गेल अछि।
