उद्योग नेता आ विशेषज्ञ सभ शनिकेँ कहलनि जे अमेरिकी राष्ट्रपति डोनाल्ड ट्रंप द्वारा प्रतिउत्तर (रेसिप्रोकल) टैरिफसँ स्मार्टफोन, कंप्यूटर आ अन्य इलेक्ट्रॉनिक्स पर छूट देब एकटा स्वागत योग्य कदम अछि। एहिसँ चीन पर भारतकेँ बढ़त भेटत।
अमेरिकी सीमा शुल्क आ सीमा सुरक्षा विभाग केर सूचना अनुसार, स्मार्टफोन आ कंप्यूटर केँ ट्रंप द्वारा अधिकांश देश पर लगाओल गेल 10 प्रतिशत वैश्विक टैरिफ आ चीन द्वारा लगाओल गेल 145 प्रतिशत केर टैरिफसँ बाहर राखल जायत।
इंडिया सेलुलर एंड इलेक्ट्रॉनिक्स एसोसिएशन (आईसीईए) केर चेयरमैन पंकज मोहिंद्रू कहलनि, “आब कोनो असाधारण व्यवधान नहि रहत। ई क्षमता सभकेँ बढ़ेबाक समय अछि आ चीनक खिलाफ लंबा समय धरि रुझान मजबूत रहत।”
चीनमे बनल आईफोन, लैपटॉप, टैबलेट आ स्मार्टवॉच पर 20 प्रतिशत टैरिफ जारी रहत। मात्र चीन पर प्रतिउत्तर (रेसिप्रोकल) टैरिफ हटाओल गेल अछि।
दोसर दिसि, रेसिप्रोकल टैरिफसँ छूटक बाद आब भारतक तरफसँ अमेरिकाकेँ निर्यात कएल जायवाला आईफोन, स्मार्टफोन, लैपटॉप आ टैबलेट पर टैरिफ जीरो भऽ गेल अछि।
वियतनामक तरफसँ अमेरिकाकेँ निर्यात कएल जाएवाला सभ सैमसंग (आ अन्य) स्मार्टफोन, लैपटॉप आ टैबलेट पर सेहो “शून्य टैरिफ” अछि। एहेनमे चीनक मुकाबलामे भारत आ वियतनाम बेसी नीक स्थितिमे अछि।
कस्टम नोटिसक अनुसार, अमेरिकामे प्रवेश करयवाला वा 5 अप्रैलसँ पूर्व गोदामसँ बाहर कएल जाए वाला उत्पाद पर ई छूट लागू होइछ। छूटमे सेमीकंडक्टर, सोलर सेल आ मेमोरी कार्ड सहित अन्य इलेक्ट्रॉनिक उपकरण सेहो शामिल अछि।
साइबरमीडिया रिसर्च (सीएमआर) केर इंडस्ट्री रिसर्च ग्रुपक उपाध्यक्ष प्रभु राम कहलनि जे अमेरिकी टैरिफमे छूटसँ ग्लोबल टेक्नोलॉजी क्षेत्रक लेल बहुत जरूरी राहत अछि, जाहिसँ उपभोक्ता इलेक्ट्रॉनिक्स, सेमीकंडक्टर्स आ हार्डवेयर पर दबाव कम होइत अछि। ई कदम टेक्नोलॉजी क्षेत्रक प्रमुख कंपनी सभ, विशेषकर एप्पल, जे एहि विवादमे फंसि गेल छल, केर संग-संग व्यापक चिप आ हार्डवेयर उद्योग केर सेहो राहत प्रदान करैत अछि।
