दिल्ली महिला आयोग (डीसीडब्ल्यू) केर पूर्व अध्यक्ष आ राज्यसभा सदस्य स्वाति मालीवालक मेडिकल रिपोर्ट आयल अछि। रिपोर्टक अनुसार, स्वातीक बामा पैर, दहिना आँखि, चेहरा आ माथ पर चोट लगबाक पुष्टि भेल अछि। स्वाति शुक्रदिन चिकित्सा जाँचक लेल एम्स पहुँचलीह। ओ माथामे चोटक बात सेहो कयलनि।
दिल्ली पुलिस स्वाति मालीवाल पर हमलाक मामिलामे बिभव कुमारकेँ गिरफ्तार कयलक अछि। बिभव कुमारसँ सिविल लाइन्स पुलिस स्टेशनमे पूछताछ कयल जा रहल अछि। बिभव कुमारकेँ पहिने सिविल लाइन्स पुलिस हिरासतमे लेने छल। ओकर बाद हुनका गिरफ्तार कए लेल गेल।
विभव कुमारक ओकील, जे पुलिस स्टेशनक बाहर पहुँचल छलाह, हुनका सेहो भीतर जयबाक अनुमति नहिं भेटल अछि। गिरफ्तारीसँ पहिने बिभव कुमार दिल्ली पुलिसकेँ दूटा मेल पठौने छलाह। पहिल मेलमे ओ स्वाति मालीवालक विषयमे शिकायत कयलनि आ दोसर मेलमे जाञ्चमे दिल्ली पुलिसक सहयोग करबाक बात कहलनि।
एहि मामिलामे बिभव कुमारक ओकीलक आरोप अछि जे हुनका एखन धरि एफ.आई.आर.क प्रति नहिं भेटल अछि। आम आदमी पार्टीक नेता पहिनेसँ एकरा दिल्लीक मुख्यमंत्रीकेँ फंसाबय लेल स्वाति मालीवालक उपयोग करबाक षड्यंत्र बता चुकल छथि।
हालहिमे ओ दिल्लीक मुख्यमंत्री अरविन्द केजरीवालक निजी सचिव बिभव कुमारपर पेट, छाती आ अन्य अंगपर हमला करबाक आरोप लगओने छलथि। मुख्यमंत्री निवाससँ सामने आयल वीडियोमे सुरक्षाकर्मी स्वातीकेँ बाहर लऽ जाइत देखल जा रहल अछि। ई वीडियो १३ मईकेँ अछि। वीडियोमे स्वाति चलबामे असमर्थ देखल जा रहल अछि।
एम्हर आरोपी बिभव कुमारक नामसँ आयल मेलमे स्वाति द्वारा लगायल गेल आरोपकेँ राजनीतिसँ प्रेरित कहल गेल अछि। मेलमे बिभव कथित रूपसँ कहलनि जे स्वाति बहुत दिन पहिने हमरा झूठ मामिलामे फंसेबाक धमकी देने छलीह। हुनकर आरोप सत्यसँ बहुत दूर आ राजनीतिसँ प्रेरित अछि। स्वाति एहि मामिलामे दिल्ली पुलिसमे लिखित शिकायत दर्ज कऽ अदालतमे अपन बयान सेहो दर्ज कयने छथि।
एहिसँ पहिने स्वाति अपन सोशल मीडिया एक्स हैंडल पर पोस्ट कयलनि जाहिमे बिभव कुमारकेँ बचाबय केर आरोप आम आदमी पार्टी पर लगौने छलीह।
