अन्तरिक्ष एजेंसी नासाक वैज्ञानिकसभक अनुसार, भारतीय मूलक अमेरिकी अंतरिक्ष यात्री सुनीता विलियम्स आ बैरी विल्मोरकेँ पृथ्वी पर लऽ जा रहल वाहन १९-०३-२०२५, भोर ३:२७ बजे अमेरिकाक फ्लोरिडामे समुद्र तलपर उतरल।
अलेक्जेंडर गोरबुनोव फ्लोरिडा केर तल्हासीमे स्पेसएक्स ड्रैगन अन्तरिक्ष यानमे सवार भऽ पृथ्वी पर घुरि अयलाह। यानक सफल स्प्लैशडाउनक बाद निक हेग, बुच विल्मोर, सुनीता विलियम्स आ रोस्कोस्मोसक अन्तरिक्ष यात्री आनन्दसँ हाथ लहराबैत घुरि अयलाह आ अपन मुस्कानक संग अभिवादन कयलनि। पृथ्वी पर पहुँचला पर सुनिता विलियम्स उपस्थित लोकसभकेँ अपन हाथ देखाकऽ अभिवादन कयलनि।
जनतब जे सुनीता विलियम्सक अन्तरिक्ष मिशन ५ जून, २०२४ केँ शुरू भेल छल, जे मात्र ८ दिन लम्बा छल, मुदा तकनीकी समस्याक कारण, ओ आ हुनकर साथी बुच विल्मोर, निक हेग आ रोस्कोस्मोस ९ मास धरि अन्तरिक्षमे फँसल रहलाह।
इहो जनतब जे अन्तरिक्षमे बहुत समय बितयलाक बाद हड्डी आ मांसपेशी बहुत प्रभावित भऽ सकैत अछि। अन्तरिक्ष यात्री अन्तर्राष्ट्रीय अन्तरिक्ष स्टेशन (आईएसएस) पर सूक्ष्म गुरुत्वाकर्षण (अर्थात गुरुत्वाकर्षणक कमी) मे हेलैत छथि, जे हुनक शरीरकेँ प्रभावित करैत अछि। पृथ्वी पर, हमर शरीरकेँ लगातार गुरुत्वाकर्षणक विरुद्ध काज करय पड़ैत छैक, जे हमर मांसपेशी आ हड्डीकेँ मजबूत रखैत छैक। मुदा, अन्तरिक्षमे, गुरुत्वाकर्षण नहि होइत छैक, जाहिसँ मांसपेशीसभक शक्ति आ हड्डीक घनत्वमे कमी आबि जाइत छैक।
एकटा महत्वपूर्ण बिंदु ई अछि जे अन्तरिक्ष यात्री सभ मास अपन हड्डीक द्रव्यमानक लगभग १% खो सकैत छथि, विशेष रूपसँ रीढ़, नितम्ब आ जांघक हड्डीमे। एकर अर्थ अछि जे पृथ्वी पर घुरलाक बाद हड्डीक फ्रैक्चरक खतरा बढ़ि सकैत अछि। एकरा कम करबाक लेल अन्तरिक्ष यात्री हड्डीक शक्ति बनाकऽ रखबाक लेल आईएसएसमे कठोर व्यायाम करैत छथि।
भारतीय मूलक अन्तरिक्ष यात्री कतेको प्रमुख कीर्तिमान स्थापित कयने छथि। सुनीता विलियम्स एहि बेर आईएसएसमे सबसँ बेसी समय धरि रहबाक कीर्तिमान स्थापित कयलनि अछि। एक बेरमे अन्तरिक्षमे २८६ दिन बितायलाक बाद सुनीता नासाक रिकॉर्ड बुकमे सेहो अपन छाप छोड़ि चुकल छथि। वास्तवमे, अमेरिकी अन्तरिक्ष यात्रीसभमे, एकटा यात्रामे आईएसएस पर सबसँ बेसी दिन बितयबाक रिकॉर्ड वर्तमानमे फ्रैंक रुबियोक नाम अछि। एम्हर मार्क वन्दे हेई आईएसएस पर कुल ३५५ दिन बितौने छथि। हुनक बाद स्कॉट केली, महिला अन्तरिक्ष यात्री क्रिस्टीना कोच, आ पेगी व्हिटसन छथि।
एहि सन्दर्भमे, सुनीता विलियम्स अन्तरिक्ष यात्रीसभमे छठम स्थान प्राप्त कयलनि अछि जे एकटा मिशनक अवधिमे आईएसएस पर सबसँ बेसी दिन बितौने छथि। ओ एहि मिशनक लेल अन्तरिक्ष यात्री एंड्रयू मॉर्गन द्वारा स्थापित २७२ दिनक पछिला रिकॉर्ड तोड़ि देलनि।
