सुनील सिंहक विधान परिषदक सदस्यता सेहो रद्द, बिस्कोमान अध्यक्ष पद पहिनेहें छिनायल

पटना
*

बिहारक पूर्व मुख्यमंत्री राबड़ी देवीक मुँहबोला भाय सुनील सिंहक सदस्यता रद्द कऽ देल गेल अछि। विधान परिषदक आचार समिति सुनील सिंहक विरुद्ध कारवाईक सिफारिश कयने छल। आरोप छल जे सुनील सिंह पछिला चारि बैसारसँ सदनमे उपस्थित नहिं भेलाह। पाँचममे ओ अयलाह मुदा आरोपक जवाब नहिं देलनि। एतबे नहि, ओ मुख्यमंत्री नीतीश कुमारक खिलाफ बयान दैत रहल छथि। हुनकर व्यवहार सेहो असंसदीय आ लोकतंत्रक विरुद्ध अछि। एहन स्थितिमे हुनकर सदस्यता किएक नहि रद्द कएल जाएत।

मानसून सत्रक अंतिम बैसारमे हुनक सदस्यता रद्द कऽ देल गेल। उपसभापति रामवचन हुनक सदस्यता रद्द करबाक प्रस्तावकेँ मंजूरी देलनि।

एहि पर सुनिल सिंह कहलनि, ” एक गोटे लोकसभा सदस्य बनबाक लेल आ दोसर गोटे उपसभापति बनबाक लेल एहन रिपोर्ट तैयार कयलनि आ हमर बलि लेलनि। ओ सीतामढ़ीक पूर्व सांसद देवेश चन्द्र ठाकुर आ उपसभापति रामवचन रायक उल्लेख कऽ रहल छलाह। सुनील सिंहकेँ बृहस्पतिकेँ देर राति बिस्कोमान अध्यक्षक पदसँ हटा देल गेल छल।

राजद नेता सुनील सिंह कहलनि जे आजुक दिन काला दिन मानल जायत। आइ विधान परिषदमे लोकतंत्रक हत्या भऽ गेल अछि। हमर सदस्यता रद्द कएल गेल। एहि घटनाक पटकथा मुख्यमंत्री निवास पर लिखल गेल छल। हम गरीबक लेल, युवाक लेल आवाज उठबैत रहलहुं। हम जनहितमे आवाज उठबैत रहलहुं। हम शुरूसँ सीएम नीतीश कुमारकेँ खटकैत रहलहुँ। षड्यंत्रक तहत हमर सदस्यता रद्द कऽ देल गेल। अहाँ ककरोसँ पूछू आ ओ कहत जे ई लोकतांत्रिक मूल्यक हत्या अछि। नियमक विरुद्ध हुनकर हत्या कएल गेल अछि। मुख्यमंत्री नीतीश कुमार लालच दऽ केँ साजिश कयलनि। मिमिक्री केर सवाल पर ओ कहलनि कि सब आरोप निराधार आ बेबुनियाद अछि। जांच होबए केर चाही।