केंद्रीय गृहमंत्री अमित शाह छत्तीसगढ़क सुकुमा जिलामे शनिकेँ सुरक्षाबलक कार्यवाहीमे 16 नक्सलीक मृत्यु पर कहलनि ई 31 मार्च 2026 सँ पहिनहि नक्सलवाद समाप्त करबाक सरकारक संकल्पक हिस्सा अछि।
ओ सोशल मीडियाक प्लेटफर्टम एक्स पोस्टमे कहलनि, “नक्सलवाद पर एकटा आओर प्रहार ! हमर सुरक्षा एजेंसी सभ सुकमामे एकटा अभियानक दौरान 16 नक्सलीकेँ धराशायी क’ देलनि आ स्वचालित हथियारक एकटा बड़का जखीरा बरामद कएलनि। प्रधानमंत्री नरेंद्र मोदीक नेतृत्वमे हम 31 मार्च 2026 सँ पहिनहि नक्सलवाद समाप्त करबाक संकल्प लेने छी। हथियार रखय वाला लोकनिसँ हमर अपील अछि जे हथियार आ हिंसासँ परिवर्तन नहि भऽ सकैत अछि, मात्र शांति आ विकाससँ परिवर्तन होयत।
जनतब जे सुकमा जिलाक केरलापाल इलाकामे चलि रहल नक्सल विरोधी अभियानमे अखन धरि 16 नक्सलीक शव बरामद भेल अछि। ई अभियान 28 मार्चसँ जारी अछि, जखनि जिला रिजर्व गार्ड (डीआरजी) आ केंद्रीय रिजर्व पुलिस बल (सीआरपीएफ) केर संयुक्त टीम नक्सलीक उपस्थिति केर सूचना पर ऑपरेशन शुरू कयलक। 29 मार्चकेँ भोर 8 बजेसँ नक्सली आ सुरक्षा बलक बीच मुठभेड़ निरंतर जारी अछि। सुरक्षाबल सभ मुठभेड़ स्थलसँ भारी मात्रामे हथियार आ गोला-बारूद बरामद कएलनि अछि, जाहिमे एके-47, एसएलआर, राइफल, पॉइंट 303 राइफल, रॉकेट लॉन्चर, बीजीएल लॉन्चर आ विस्फोटक पदार्थ शामिल अछि। मुठभेड़मे मारल गेल नक्सली केर पहिचान कयल जा रहल अछि आ सुरक्षाबल सभ एहि ऑपरेशनमे आओर नक्सलीक मृत्यु वा घायल होएबाक आशंका व्यक्त कऽ रहल अछि।
एहि ऑपरेशनक दौरान दूटा जवान सेहो घायल भ’ गेल। यद्यपि, घायल जवान सभक स्थिति सामान्य कहल जा रहल अछि आ ओ सभ खतरासँ बाहर छथि। मुठभेड़ स्थलक आसपासक क्षेत्रमे गश्त आ खोजी अभियान जारी अछि। 25 मार्चकेँ सुरक्षाबल सभ इनामी नक्सली सुधीर उर्फ सुधाकर सहित 3 नक्सली सभकेँ मारने छल।
