मिथिला क्षेत्रीय बिहारक किशनगंजसँ खबरि अछि जे अचानक एकटा पैसेंजर ट्रेन (75720) केर इंजनमे भीषण आगि लागि गेल, मौका पर अफरा-तफरी मचि गेल। रेलवे यात्री बोगीसँ भागय लगलाह।
ई घटना किशनगंज कटिहार रेल मंडल अंतर्गत गायसल रेलवे स्टेशन पर भेल अछि। सिलिगुड़ी राधिकापुर डीईएमयू यात्री ट्रेन नंबर 75720 केर इंजनक पाछुक कोच गार्ड ब्रेकमें अचानक आगि लगलाक कारण अफरातफरी मचि गेल। ई ट्रेन किशनगंज आबि रहल छल। गायसल स्टेशन पहुँचलाक बाद यात्री सबकेँ ट्रेनसँ धुआं उठैत देखायल जेकर बाद एकर सूचना सिस्टमक अधिकारीकेँ देल गेल।
आगिक जानकारी भेटैत देरी स्टेशन पर मौजूद यात्री आ रेलवे कर्मचारीमे हड़कंप मचि गेल। मुदा राहतक बात ई अछि जे सभ यात्री सुरक्षित छथि आओर एहि घटनामे कोनो तरहक जानमालक नुकसानक कोनो खबरि नहिं अछि, घटनाक जानकारी भेटैत देरी रेलवेके वरिष्ठ अधिकारी आ फायर ब्रिगेडक जवान मौका पर पहुंचि आगि पर नियंत्रण करय लगलाह। आगि आ धुआंक कारण किछु समय तक स्टेशन पर अराजक स्थिति बनल छल, मुदा रेल प्रशासन तत्काल कारवाई शुरू कयलक आ स्थिति पर काबू करबाक प्रयास कयलक।
एतय आगिक सही कारण एखनि धरि पता नहि चलल अछि आ एकर विस्तृत जांच रेल प्रशासन द्वारा कयल जा रहल अछि। प्रारंभिक अनुमानक अनुसार तकनीकी खराबी वा शॉर्ट सर्किट आगिक कारण मानल जा रहल अछि, मुदा एकर पुष्टि करय लेल जांच पूरा हेबाक इंतजार अछि।
ध्यान देबय वाला बात ई अछि कि कटिहार रेलवे प्रमंडलक एकटा महत्वपूर्ण स्टेशन गायसल रेलवे स्टेशन किशनगंज आ कटिहारक बीच व्यस्त मार्ग पर स्थित अछि। एहि रूट पर रोजाना बहुत रास यात्री आ मालगाड़ी चलैत अछि, जाहि कारण एहि घटनासँ रेल सेवा प्रभावित हेबाक संभावना अछि। आगि लगलाक बाद किछु समय धरि स्टेशन पर ट्रेनक संचालन प्रभावित रहल, जाहि कारण यात्री लोकनिकेँ असुविधाक सामना करय पड़लनि। यात्री सब कहलनि जे, आगिक लपट देखि स्टेशन पर भगदड़ सन स्थिति पैदा भs गेल। मुदा, रेलवे कर्मचारी आ स्थानीय पुलिसक शीघ्रताक कारण जल्दिये स्थिति पर नियंत्रण भs गेल। रेलवेक एकटा अधिकारी कहलनि जे, आगि पर नियंत्रणक लेल दमकल विभागक कतेको गाड़ी मौका पर पहुंचल आ आगि पूरा तरहे मिझेबाक प्रयास जारी छल।
