घटना मुजफ्फरपुर जंक्शन पर ठाढ़ ट्रेनमे अचानक भेल धमाका, आरपीएफ जवानक मृत्यु Maithil Punarjagran Prakash April 22, 2024 0 Comments मुजफ्फरपुर * सोम कऽ भोरमे मिथिला क्षेत्रीय बिहारक मुजफ्फरपुर जंक्शन पर ठाढ़ वलसाड एक्सप्रेसमे अचानक विस्फोटक कारण हलचल मचि गेल। विस्फोटक घटनामे आरपीएफक एकटा जवान मारल गेल। ई दुर्घटना ट्रेनक डिब्बामे अग्निशामक यन्त्रक विस्फोटक कारण भेल छल। घटनाक बाद सुरक्षाकर्मी घायल कांस्टेबलकेँ सदर अस्पताल लऽ गेलाह जतय डॉक्टरक टीम हुनका मृत घोषित कऽ देलक। एहि घटनाक संबंधमे कहल जाइत अछि जे सोमदिन भोरे वलसाडसँ ट्रेन मुजफ्फरपुर जंक्शन आयल छल। ट्रेन प्लेटफार्म पर ठाढ़ छल। सभ यात्री ट्रेनसँ उतरि गेल छलाह, नहि तँ कोनो पैघ घटना भऽ सकैत छल। प्रत्यक्षदर्शीक अनुसार, एस-८ बोगीमे अचानक शॉर्ट सर्किटक कारण आगि लागि गेल। एकर बाद आगि बुझाबैत काल विस्फोटमे आरपीएफ जवानक मृत्यु भऽ गेल। आरपीएफ केर मृतक जवानक पहिचान विनोद कुमारक रूपमे भेल अछि। विनोद यादव आराक निवासी छलाह। घटनाक सूचना भेटैत रेलवेक वरिष्ठ अधिकारी घटनास्थल पर पहुँचि गेलाह। शवकेँ पोस्टमार्टम लेल एसकेएमसीएच पठाओल गेल अछि। एफएसएल टीमकेँ घटनास्थल पर बजा लेल गेल अछि। ई घटना भोरे लगभग ६.४० बजे भेल। आरपीएफ आईजी अमरेश कुमार एहि घटनाक पुष्टि कयलनि अछि। जांचक बात कहलनि अछि। आरपीएफक एकटा जवान कहलनि जे कोच एस-८क शौचालयमे शॉर्ट सर्किट छल। आरपीएफ केर जवान आगि मिझाबय लागल। दूटा अग्निशामक यंत्र छल। एकटासँ आगि मिझा देल गेल, मुदा जँ कने आओर बांचल छल, तखन दोसर सिलेंडरसँ आगि बुझाबय लागल, तखन ओ फटि गेल। सिलेंडरक पाछू भाग फटि गेल, जाहिसँ मृत्यु भऽ गेल। Spread the love
