जिला अंतर्गत सोनावर्षा प्रखंडक नोनैती गाममे मंगल दिन साँझमे सरस्वती मंदिर प्रांगणमे प्रतिभा सम्मान समारोह सह गोष्ठीक आयोजन कयल गेल। सरस्वती विकास मंच द्वारा आयोजित एहि कार्यक्रममे डॉ. राकेश मिश्रकेँ सम्मानित कयल गेल। एहि अवसर पर अध्यक्ष प्रोफेसर अरविंद मिश्र नीरज द्वारा डॉ मिश्रकेँ पाग चादर आ प्रतीक चिन्ह भेंट कय सम्मानित कयल गेल।अध्यक्षीय संबोधनमे ओ कहल जे सफल लोकक जीवन तखन सफल होयब नीक होयत। जखन सफल लोक अपन गाम, अपन जन्मभूमि आ अपन मूलमे वापस आबि जाइत छथि। ग्रामीण क्षेत्रक बच्चा सब हुनका सबसँ प्रेरणा लऽ कऽ अपन जीवनमे आगू बढ़ैत अछि। कार्यक्रमक शुरुआत आर्या श्री अपन सशक्त काव्य पाठसँ कयलनि। कार्यक्रमक संचालन करैैत वेद प्रकाश भारतीय कहलनि जे नोनैती गाम सरस्वतीक माटि अछि।एतय कण-कणमे माता सरस्वती वास करैत छथि। अन्यान्य वक्ता लोकनिमे अनिल कुमार मिश्र, नंद किशोर मिश्र, कृष्ण देव झा, सरपंच प्रतिनिधि जय किशोर झा, पदमानंद मिश्र, कामेश्वर मिश्र, रोशन झा, निखिल झा सेहो अपन उदगार व्यक्त कयलनि। कार्यक्रममे सैकड़ों ग्रामीणक उपस्थिति उत्साहवर्धक छल।
