जेपी गोलंबर पर रोकल गेल।
छात्र नेता दिलीप कुमार कहला जे शिक्षक बहालीमे पैघ संख्यामे दोसर प्रदेश केर अभ्यर्थी बिहारमे योगदान देलनि अछि। दोसर प्रदेशक लेल कमसँ कम मात्र 10% सीट होबय केर चाही।
बिहारमे डोमिसाइल नीति लागू करबाक मांग एक बेर फेर तेज भ’ गेल अछि। बृहस्पति (05 जून, 2025) केँ छात्र संगठन डोमिसाइल नीति लागू करबाक मांग ल’ क’ पटना कॉलेजसँ मार्च निकाललक। अशोक राजपथ होइत ओ सब गाँधी मैदान पहुँचल। एतय जेपी गोलंबर पर बैरिकेडिंग लगाक’ हुनका सभकेँ रोकि देल गेल।
छात्र सभक हाथमे बैनर-पोस्टर छल। ई सब व्यक्ति सीएम हाउस धरि जाए चाहैत छलथि, मुदा जाए नै देल गेल। प्रदर्शन करनिहार छात्र सबक कहब अछि जे बिहारमे सरकारी नौकरी आ शैक्षणिक संस्थान सभमे आरक्षण केर लाभ मात्र बिहारक मूल निवासी सभकेँ भेटबाक चाही। बिहारमे कमसँ कम 90 प्रतिशत डोमिसाइल लागू हेबाक चाही।
छात्र नेता दिलीप कुमार कहला जे हमरो मांग स्पष्ट अछि। बिहारमे सरकारी नौकरी आ शैक्षणिक संस्थान सभमे आरक्षणक लाभ मात्र बिहारक मूल वासीकेँ भेटय केर चाही। पड़ोसी राज्य झारखंड आ उत्तर प्रदेशमे डोमिसाइल नीति लागु अछि। एहि कारणें एतय केर छात्र सभकेँ ओहि ठाम नौकरी नहिं भेटि रहल अछि, जखनिकि झारखंड आ उत्तर प्रदेशक युवा बिहारमे आबि क’ नौकरी लऽ रहल छथि।
दिलीप आगू कहलनि कि दोसर प्रदेश लेल कमसँ कम मात्रा 10% सीट होबय केर चाही। तीन चरणक शिक्षक बहालीमे बिहारमे बड्ड संख्यामे दोसर प्रदेशक उम्मीदवार बिहारमे योगदान देलनि अछि। तीनू चरणक शिक्षक बहालीमे उत्तर प्रदेश, झारखंडक अलावा पश्चिम बंगाल आ अन्य राज्यसँ शिक्षक बहाल भ’ चुकल छथि, जिनका सभकेँ ठीकसँ हिंदी सेहो नहिं अबैत अछि। एहेन स्थितिमें हुनका बिहारक बारेमे बेसी जानकारी नहिं अछि। ओ बच्चा सभकेँ की पढ़ाओत ?
छात्र नेता दिलीप कुमार एकटा आर मांग कयलथि। कहलथि कि शिक्षक बहालीमे जे प्रश्नन पैटर्न होइछ, ओहिमे जे प्रश्न पत्र रहैत अछि से रहय, मुदा अलगसँ बिहारसँ संबंधित 100 प्रश्नक एकटा पेपर होबय केर चाही आ ओकरा अनिवार्य करय केर चाही। एहिसँ बिहारक बच्चाकेँ पठन-पाठनमे गुणवत्ता आओत। जाधरि शिक्षक सभ बिहारक बारेमे नहिं जनथिन ताधरि बिहारक बारेमे की पढ़ेथिन।
