राष्ट्रीय जनता दल (राजद) केर राष्ट्रीय अध्यक्ष आ बिहारक पूर्व मुख्यमंत्री लालू यादवक परेशानी आब बढ़ैत देखा रहल अछि। बाबा साहेब डॉ. भीमराव अम्बेडकरक फोटोक अपमान करय केर वीडियो वायरल भेला बाद राज्य अनुसूचित जाति आयोग हुनका नोटिस भेजने अछि। आयोग राजद प्रमुखसँ 15 दिनक भीतर जवाब देबाक लेल कहलक अछि। एतबे नहि, कहल गेल अछि जे जँ स्पष्टीकरण नहि देल गेल तँ प्राथमिकी दर्ज कराओल जायत।
राज्य अनुसूचित जाति आयोगक उपाध्यक्ष देवेन्द्र कुमार राजद प्रमुख लालू यादवकेँ नोटिस जारी कयलनि, जाहिमे लिखल अछि जे सोशल मीडिया पर अहाँक जन्मदिनक वीडियो लगातार देखल जा रहल अछि, जाहिमे अहां आओर अहांक एकटा कार्यकर्ता द्वारा संविधान निर्माता बाबा साहेब भीमराव अम्बेडकरक फोटो केर अपमान कयल जा रहल अछि। अतः अहाँ सबकेँ निर्देश देल गेल अछि जे उक्त वीडियोक संबंधमे 15 दिनक भीतर आयोगक सामने अपन पक्ष प्रस्तुत करू, अन्यथा ई मानल जायत जे अहाँ ई काज जानबूझि कय कयने छी।
आयोग आगू पूर्व मुख्यमंत्री लालू यादवकेँ चेतौनी देलक जे जँ अहां 15 दिनक भीतर आयोगक समक्ष अपन पक्ष नहि पेश करब तँ अनुसूचित जाति/जनजाति अत्याचार कानूनक तहत अहाँ पर मुकदमा चलाओल जाएत।
जनतब, सोशल मीडिया पर लालू प्रसाद यादवक जन्मदिनक फोटो बहुत वायरल भेल, जाहिमे कार्यकर्ता हुनका संविधान निर्माता बाबा साहेब अम्बेडकरक फोटो भेंट कयलनि। ओहि समयमे लालू यादव कुर्सी पर आ पैर टेबुल पर छल। अम्बेडकरक तस्वीरक सामने पैर रखलाक बाद राजनीतिक बयानबाजी तेज भऽ गेल अछि। भाजपा आ जदयू हुनका पर हमला कय रहल अछि आ एकरा बाबा साहेबक अपमान कहि रहल अछि।
बिहार मंत्री अशोक चौधरी कहलानि जे लालू यादवकेँ बाबा साहेबक प्रति संवेदनशील रहबाक चाही।
