तमिलनाडु सरकार द्वारा २०२५-२६क बजटक चिन्हमे रुपयाक आधिकारिक प्रतीक (₹)क स्थान पर तमिल अक्षरक उपयोगपर विवाद उत्पन्न भऽ गेल अछि। भाजपाक प्रदेश अध्यक्ष के अन्नामलाई आ भाजपा आईटी प्रकोष्ठक प्रमुख अमित मालवीय मुख्यमंत्री एमके स्टालिन पर प्रहार करैत एकरा राष्ट्रीय चिन्हक अपमान बतौलनि।
तमिलनाडु सरकार पर प्रहार करैत अन्नामलाई कहलनि, “तमिलनाडु सरकारक २०२५-२६क बजटमे रुपयाक प्रतीक हटा देलक अछि, जकरा एकटा तमिल व्यक्ति द्वारा डिजाइन कयल गेल छल आ पूरा भारत एकरा अपनौने अछि। ई चिन्ह डीएमकेक पूर्व विधायकक बेटा उदय कुमार द्वारा डिजाइन कयल गेल छल। मुख्यमंत्री एमके स्टालिन, अहाँ एहिसँ बेसी मूर्खतापूर्ण निर्णय आर कतेक लऽ सकैत छी ?”
भाजपा आईटी प्रकोष्ठक प्रमुख अमित मालवीय सेहो एहि निर्णयक आलोचना करैत कहलनि जे भारतीय अकादमिक आ डिजाइनर उदय कुमार धर्मलिंगम डीएमकेक पूर्व विधायकक बेटा छथि। ओ भारतीय रुपयाक प्रतीक डिजाइन कयलनि, जकरा पूरा भारतमे स्वीकार कयल गेल, मुदा मुख्यमंत्री एम.के. स्टालिन तमिलनाडुक बजट २०२५-२६क दस्तावेजसँ एहि प्रतीककेँ हटा देलनि। ई तमिलक अपमान अछि। कतेक हास्यास्पद अछि ?
राज्य बजट घोषणाक संबंधमे राज्य योजना आयोगक उपाध्यक्ष जे. जयराजन सवाल कयलनि जे तमिल उदय कुमार द्वारा बनाओल गेल रुपयाक प्रतीक बजट लोगोमे किएक बदलल गेल। ओ कहलनि जे तमिल लोकनि बहुत रास खोज कयने छथि, मुदा एकरा विशेष रूपसँ उजागर करबाक आवश्यकता नहि अछि।
जनतब जे तमिलनाडु सरकारक निर्णयकेँ लऽ कऽ राजनीतिक बहस तेज भऽ गेल अछि। विपक्ष एकरा राष्ट्रीय चिन्हक प्रति अनादर कहि रहल अछि, जखनि कि डीएमके सरकार एहि परिवर्तनकेँ तमिल भाषाक सम्मानक विषयक रूपमे प्रस्तुत कऽ रहल अछि।
सरकार २०२५-२६क बजटमे प्रतीक ‘₹’ क स्थान पर ‘ரூ’ चिह्न लगा देलक अछि। तमिल लिपिमे ई अक्षर ‘रू’ अछि।
