बिहारक अपर मुख्य सचिव एहि बात पर जोर देलनि जे स्टेडियम मात्र निर्माण धरि सीमित नहि रहय, बल्कि ओतय छात्र आ स्थानीय निवासी नियमित रूपसँ खेल गतिविधिमे भाग लैथि। हुनक कहब छल जे खेल विभाग, बिहार सरकार राज्यक युवाकेँ खेलक क्षेत्रमे आगू बढ़ाबय लेल प्रतिबद्ध अछि।
खेल विभागक अपर मुख्य सचिव काल्हि राज्यक समस्त जिला खेल पदाधिकारी संग एकटा महत्वपूर्ण समीक्षा बैसार कयलनि। एहि बैसारमे राज्यमे खेल अवसंरचनाक विकास आ खेल गतिविधिक विस्तार हेतु कएल जा रहल कार्यसभक गहन समीक्षा कएल गेल।
अपर मुख्य सचिव कहलनि जे सरकारक सर्वोच्च प्राथमिकता अछि जे प्रत्येक ब्लॉक स्तर पर आउटडोर स्टेडियमक लेल भूमि उपलब्ध कराओल जाए, ताकि ग्रामीण आ शहरी क्षेत्रक युवाकेँ खेलक बेहतर अवसर भेटि सकय।
एखनि धरिक प्रगतिक बात करी तँ बिहारक 534 प्रखंडसँ 252 मे आउटडोर स्टेडियम पूर्ण रूपेँ तैयार अछि आ उपयोग लेल उपलब्ध अछि। 122 प्रखंडमे स्टेडियम निर्माण कार्य अंतिम चरणमे अछि, जखनिकि 160 ब्लॉकमे ई कार्य प्रगतिक पथ पर अछि। विभाग स्पष्ट निर्देश देलक अछि जे जाहि प्रखंडमे स्टेडियम तैयार भऽ चुकल अछि, ओहिठाम नागरिक आ स्कूलक छात्र द्वारा एकर सक्रिय उपयोग सुनिश्चित कएल जाए, ताकि खेल संस्कृतिक विकास भऽ सकय।
बैसारमे जिला खेल पदाधिकारीसभकेँ आदेश देल गेल जे ओ हरेक सप्ताह अपन-अपन क्षेत्रक प्रखंडक दौरा करथि आ स्टेडियम निर्माण काजक प्रगतिक स्वंय निगरानी करथि। एकर संगहि, हुनका स्थानीय नागरिक समाजक प्रतिनिधि सभ आ स्कूलसभक संग संवाद स्थापित करबाक लेल कहल गेल ताकि आउटडोर स्टेडियमक अधिकतम इस्तेमाल सुनिश्चित कएल जा सकय।
एहि बैसारमे कटिहार, पूर्णिया आ बक्सर जिला खेल पदाधिकारी सभकेँ स्थानीय स्तर पर खेल गतिविधि सभक सफल संचालन आ सक्रिय भूमिका लेल अपर मुख्य सचिव विशेष रूपसँ सराहना कएलनि। अन्य जिलाक अधिकारी सभकेँ सेहो निर्देशित कएल गेल अछि जे ओ राज्यमे खेल अधोसंरचनाक विकास आ खेल गतिविधि सभक विस्तार लेल सम्पूर्ण तत्परता आ सक्रियतासँ काज करथि।
