अरुणाचल प्रदेशक नामसाई स्थित अरुणाचल यूनिवर्सिटी ऑफ़ स्टडीजक सेमिनार सभागारमे भाषा विभाग, कला आ सामाजिक विज्ञान संकाय, शोध एवं विकास प्रकोष्ठ आ आंतरिक गुणवत्ता आश्वासन प्रकोष्ठक संयुक्त तत्वावधानमे प्रेमचंद जयंतीक अवसर पर मुंशी प्रेमचंद पर विशेष व्याख्यान कार्यक्रमक आयोजन कयल गेल।
अतिथिक सम्मानक संग शुभारंभ कयल गेल कार्यक्रममे स्वागत संबोधन कला आ सामाजिक विज्ञान संकायक संकायाध्यक्ष प्रोफेसर बिप्लब त्रिपाठी द्वारा देल गेल । एहि अवसर पर विश्वविद्यालयक कुलपति प्रोफेसर अजय झा अपन भाषणक माध्यमसँ हिंदी साहित्य आ मुंशी प्रेमचंदक प्रति विशेष स्नेह व्यक्त कयलनि आ संगहि ‘गबन’ सन उपन्यासक संदर्भ दैत मुंशी प्रेमचंदक यथार्थवादक विस्तारसँ वर्णन सेहो कयलनि।
विश्वविद्यालयक रेक्टर प्रोफेसर डी.एस. हर्नवाल अपन भाषणमे प्रेमचंदक जीवन परिचय दैत हुनकर आदर्शवाद आ यथार्थवाद पर विशेष प्रकाश डाललनि । कार्यक्रममे आमंत्रित वक्ताक रूपमे उपस्थित डिब्रूगढ़क हनुमानबक्स सूरजमल कनोई महाविद्यालयक हिन्दी विभागाध्यक्ष डॉ. लखिमा देओरी अपन विशेष व्याख्यानमे प्रेमचंदक अधिकांश कहानी आ उपन्यासक चरित्र, कथावस्तु आदिक हवाला दैत आधुनिक युगमे ओकर प्रासंगिकता पर विश्लेषण प्रस्तुत कयलनि । श्रीमती देओरी द्वारा प्रदान कायल गेल विशेष व्याख्यानसँ विद्यार्थी लोकनिक ज्ञानवर्धन भेल । कार्यक्रमक अंतमे भाषा विभागक प्रमुख डॉ. पंचदेव प्रसाद धन्यवाद ज्ञापन कयलनि।
मंचक संचलान अंग्रेजीक सहायक प्राध्यापिका मंजू कुमारी आ हिंदीक सहायक प्राध्यापिका आशा कुमारी कोइरी संयुक्त रूपसँ कयलनि।
एहि अवसर पर विश्वद्यालयक प्राध्यापक-प्राध्यापिका , कर्मचारी लोकनि आ विश्वविद्यालयक विद्यार्थी लोकनि सहित अन्य कतेको गणमान्य व्यक्ति सब उपस्थित छलथि।
