सरकार सारण हिंसा मामिलामे कारवाई कयलक अछि। चुनाव आयोगक निर्देश पर सरकार एसपी गौरव मंगला पर कारवाई कयलक अछि।
सारण हिंसा मामिलामे एसपीकेँ हटा देलक अछि। हिंसा मामिलामे चुनाव आयोगक आदेश पर एसपी केर खिलाफ कारवाई कएल गेल अछि। चुनाव आयोग एसपी गौरव मंगला केर तबादला कऽ देलक अछि। रिपोर्टक अनुसार राज्य सरकार चुनाव आयोगकेँ निर्देशक पालन करैत कारवाई कयलक अछि। चुनाव आयोगक निर्देश पर राज्य सरकार आदेश जारी कयलक अछि। छपराक एसपीकेँ तत्काल प्रभावसँ हटा देल गेल। जानकारी केर अनुसार कुमार आशीष एसपी रेल मुजफ्फरपुरकेँ छपराक नव एसपी बनाओल गेल अछि। जिलामे भेल हिंसा आ मतदानक अगिला दिन एक व्यक्तिक मृत्युक बाद निर्वाचन आयोग राज्य सरकारकेँ एसपी मंगलाक विरुद्ध कारवाई करबाक निर्देश देने छल।
गौरतलब अछि जे सारण लोकसभा सीटक लेल पाँचम चरणक मतदानमे झड़प आ हंगामाक बाद २१ मईकेँ भोरमे फेर राजद आ भाजपा कार्यकर्ताक बीच झड़प भऽ गेल छल। झड़प हिंसक भऽ गेल छल आ गोलीबारीक घटना भेल छल जाहिमे एकटा व्यक्तिक मृत्यु भऽ गेल छल। एकर बाद हिंसक झड़पक दौरान प्रयुक्त बंदूक पुलिस बरामद कऽ लेलक। भाजपा रोहिणी आचार्य पर आरोप लगओलक जे ओ अपन समर्थकक संग बूथ लूटबाक प्रयास कऽ रहल छलथि।
एकर बाद पुलिस सारणमे चुनावी हिंसाक संबंधमे लालू यादवक उम्मीदवार आ बेटी रोहिणी आचार्यक खिलाफ २ टा मामिला दर्ज कयलक। भाजपा कार्यकर्ता मनोज सिंह केर नाम पर नगर थानामे मामिला दर्ज कयल गेल छल। ओतहि जिला प्रशासनक तरफसँ सदर क्षेत्राधिकारी आँचल कुमारी द्वारा छपरा नगर थानामे दोसर मामिला दर्ज कयल गेल अछि। भाजपा आ राजद दुनू एहि मामिलामे एक दोसराक खिलाफ मोकदमा दायर कयने अछि। सारण घटनाक गम्भीरताकेँ देखैत जिला प्रशासन २५ मई राति १२ बजे धरि जिलामे इंटरनेट प्रतिबन्ध बढ़ा देने छल।