1.11 करोड़ लोकक खातामे 12.27.27 करोड़ टका ट्रांसफर कयलाक बाद मुख्यमंत्री नीतीश कुमार कहलनि जे अगिला माससँ सबटा लाभार्थीकेँ सभ मासक 10 तारीखकेँ पेंशन भेटत।
मुख्यमंत्री नीतीश कुमार शुक्रकेँ (11 जुलाई) सामाजिक सुरक्षा पेंशन योजनाक किस्त लाभार्थीक खातामे हस्तांतरित कय देलनि। एहि योजनाक तहत डीबीटीक माध्यमसँ 1.11 करोड़ लाभार्थीक बैंक खातामे 1227.27 करोड़ टका भेजल गेल।
सामाजिक सुरक्षा पेंशन योजनाक तहत पहिने लाभार्थीकेँ प्रति माह 400 टकाक राशि देल जाइत छल, जे आब बढ़ाकेँ 1100 टका भऽ गेल अछि। एही कार्यक्रमक दौरान समाज कल्याण विभाग द्वारा सामाजिक सुरक्षा पेंशन योजना पर आधारित एकटा लघु फिल्म मुख्यमंत्रीक समक्ष देखाओल गेल। ई फिल्म पेंशन योजनाक लाभार्थीक कहानी अछी, जाहि कारण एकर जीवन आसान भऽ गेल।
एहि अवसर पर बिहारक सब 38 जिलामे कार्यक्रमक आयोजन कयल गेल, जाहिमे जिलाक प्रभारी मंत्री, जनप्रतिनिधि, जिला मजिस्ट्रेट, लाभार्थी आ भारी संख्यामे आम लोक उपस्थित छलाह। ओ कहलनि जे सामाजिक सुरक्षा पेंशन योजनाक 54.5 प्रतिशत लाभार्थी महिला छथि। इ समावेशी विकास आ सामाजिक न्यायकें दर्शाबैत अछि।
कार्यक्रमकेँ संबोधित करैत मुख्यमंत्री कहलनि जे 24 नवंबर 2005 केँ सत्तामे अयलाक बाद हम राज्यक विकास लेल लगातार काज कयलहुँ अछि। शुरूएसँ हम सब वर्गक उत्थानक लेल कतेको योजना शुरू कयलहुं अछि। समाजक कमजोर वर्गक कल्याणक लेल हम सब निरंतर काज कऽ रहल छी। 21 जून 2025 केँ महिला संवाद कार्यक्रममे महिला प्रतिनिधिसँ चर्चाक दौरान हम सब सोचलहुं जे सामाजिक सुरक्षा पेंशनक राशि बढ़ाबी। राज्य सरकार आब निर्णय लेलक अछि जे सामाजिक सुरक्षा पेंशन योजनाक तहत बुजुर्ग, दिव्यांग आ विधवा महिलाकेँ जून 2025 सँ लागू भेल हर मास 400 टकाक बदला 1100 टकाक पेंशन राशि देल जाएत, ताहि लेल आई बढ़ल पेंशन राशि सीधा लाभार्थीक बैंक खातामे पठा देल गेल अछि। हम बहुत खुशी महसूस कय रहल छी।
मुख्यमंत्री कहलनि जे, बुजुर्गमे 60 सालसँ ऊपरक महिला आ पुरुष दुनूकेँ संग-संग दिव्यांग लोक, चलय-सुनयमे, बाजयमे, देखयमे वा सीखयमे दिक्कत वला पुरुष आ महिला आओर विधवा जिनकर पतिक मौत भऽ गेल छनि। एहि तरहें जून 2025 लेल प्रति लाभार्थी 1100 टकाक दरसँ तीनू प्रकारक 1 करोड़ 11 लाखसँ बेसी लोककेँ बैंक खातामे कुल 1227 करोड़सँ बेसी केर कुल पेंशन राशि सीधा भेजल गेल अछि। हम विभागकेँ निर्देश देलहुं अछि जे एहि कार्यक्रमक बाद हर महीना 10 तारीखकेँ पेंशन राशि लाभार्थीक खातामे भेजब जरूरी अछि।
ओ कहलनि जे हम सब शुरूसँ बिहारक विकास लेल मिलिकय काज कय रहल छी आ भविष्यमे सेहो काज करब। हम सब लगातार अहाँक जीवनकेँ सम्मानजनक आ बेहतर बनेबाक लेल काज कऽ रहल छी। अपने सब गोटेकेँ बधाई दैत छी।
