भागलपुरमे शराब लदल स्कॉर्पियोक संग तस्कर गिरफ्तार, झारखंडसँ बिहार आनल गेल

भागलपुर समदिया
*

झारखंडसँ स्कॉर्पियोमे शराबक खेप आनल जा रहल छल, जकरा भागलपुर पुलिस पकड़ि लेलक अछि। एहि दौरान पुलिस स्कॉर्पियोमे सफर कs रहल एकटा तस्करकेँ सेहो गिरफ्तार कयलक अछि।

पूछताछक दौरान ई तस्कर कहलक जे, शराबक खेप झारखंडक गोड्डाक रास्तासँ भागलपुर आनल गेल छल। एतयसँ नवगछिया लऽ जेबाक छल। पुलिस केर गुप्त सूचना भेटल छल जे झारखंडक गोड्डा जिलाक एकटा शराब तस्कर स्कॉर्पियोमे भारी मात्रामे विदेशी शराब लs कs भागलपुर होइत नवगछिया दिसि जा रहल अछि। सूचना भेटैत देरी पुलिस तुरंत गाड़ी जांच अभियान शुरू कs देलक। एहि अभियानमे पुलिस जीरो माइल चौक पर शराब लदल स्कॉर्पियोके पकड़ि लेलक। पुलिससँ भेटल जनतबक अनुसार शराब तस्करकेँ पहुंचैत देरी पुलिस ओकरा सबकेँ रुकबाक इशारा देलक।

आरोप अछि जे पुलिसक संकेतक बाद तस्कर गाड़ीकेँ साइडमे लगा भागयके कोशिश कयलक। मुदा पुलिस बलक मददिसँ एकटा तस्करकेँ गिरफ्तार कयल गेल, जखनिकि दोसर तस्कर ओतयसँ भागि गेल. पुलिस मौका परसँ स्कॉर्पियो आ शराब जब्त कs लेलक अछि। गिरफ्तार आरोपी तस्करसँ पुलिस पूछताछ कs रहल अछि। मामिलाक जांचमे लागल पुलिस सेहो बैकवर्ड आ फॉरवर्ड लिंकक जांच कs रहल अछि. पुलिस ई पता लगाबय केर कोशिशमे अछि जे केकर निर्देश पर शराब मंगाओल गेल छल, शराब तस्करीक सरगना के अछि एवं आर कतेको बिंदु पर जांच कs रहल अछि।