मैथिल समाज रहिकाक तत्वावधानमे छह सूत्री मांगक लेल प्रखंड कार्यालय पर धरना प्रदर्शन

मधुबनी समदिया!! मैथिल समाज रहिकाक तत्वावधानमे 31 दिसम्बर, बुधकेँ 6 सूत्री मांगक समर्थनमे प्रखंड सह अंचल कार्यालय पर एक दिवसीय धरना सह प्रदर्शन मैथिली प्रेमी अभयानंद झाक अध्यक्षतामे आयोजित कयल गेल।

सभाकेँ संबोधित करैत साहित्यकार उदयचंद्र झा विनोद कहलनि कि मिथिलाक गौरवशाली , सांस्कृतिक धरोहर, अष्टम सुचीमे मैथिली भाषाकेँ शामिल होबयकेँ पश्चातो पिछला कतेको वर्षसँ मैथिली अकादमीकेँ निष्क्रिय बना देल जाएब मैथिली भाषा प्रेमीक संग छल अछि।

मैथिल समाज रहिकाक सचिव शीतलांबर झा कहलनि कि वर्ष 1976 मे स्वतंत्र स्वायत संस्थाक रूपमे मैथिली अकादमीक स्थापना सर्जनात्मक प्रकाशन, पत्रिका प्रकाशन , व्याख्यानमालाक आयोजन साहित्यिक इतिहास लेखन,भाषा संरक्षण, अनुसंधान आ अन्वेषण, पांडुलिपि आ धरोहर साहित्यकार आ लेखककेँ प्रोत्साहन सहित अनेक क्षेत्रमे काज करैत रहल अछि। मुदा सरकार उपेक्षा पर उपेक्षा करय पर उतारू अछि।

ओ कहलनि कि अकादमी द्वारा प्रकाशित पुस्तक बिहार सहित देशक विभिन्न विश्वविद्यालय सभमे पाठ्यक्रमक रूपमे शामिल अछि। अकादमी एखनि धरि 213 टा पुस्तकक प्रकाशन कऽ चुकल अछि, जाहिमे 9 टा पुस्तककेँ साहित्य अकादमी सेहो भेटि चुकल अछि।

कृपानंद झा आजाद कहलनि कि मैथिली अकादमीकेँ पुर्ण स्वरूपमे सरकार आनय अन्यथा घोर विरोध प्रदर्शन कयल जाएत।

मुख्य मांग सभमे मैथिली अकादमीमे रिक्त पड़ल पद अविलंब भरय, रुकल पुस्तकक प्रकाशन अविलंब शुरू करय,अकादमीकेँ भरपुर सहयोग आ बजट मुहैया कराबय सहित प्राथमिक शिक्षामे मैथिली भाषामे पढ़ाई सुनिश्चित करय केर संग-संग मैथिली भाषाक शिक्षक बहाली सुनिश्चित कयल जाय। बीपीएससीमे पूर्वक भांति मैथिली भाषा सुनिश्चित कयल जाय। 7 कड़ोर मैथिली भाषा-भाषीक भावनाकेँ देखैत अविलंब मैथिली अकादमीकेँ सुव्यवस्थित ढंगसँ संचालित कयल जाएब शामिल अछि।

धरनाकेँ राजू कुमार झा, विजय श्री पुन्नू, अवधेश कुमार झा, राघवेन्द्र रमन, हरिनाथ यादव, मधु राय, भवनाथ पाठक सहित कतेको संबोधित कयलनि।

शंकरदत्त मिश्र, मो साबिर , डॉ इंद्रमोहन झा, उमर अंसारी, मो नसीम , प्रियरंजन पांडेय, राघवेंद्र रमण, अनिल सिंह, राजू पासवान , श्याम पासवान, कौशल किशोर झा, सुरेश चंद्र झा, आलोक कुमार झा, आशीष कुमार मिश्र, उदय कांत झा ललन, रुदल यादव, राजेंद्र यादव , दीपू मिश्र, दिलीप झा, प्रणव झा, कृष्ण कुमार साहू , भावेश कुमार झा, रंजन झा, ललित साहनी आदि सैकड़ों मिथिला-मैथिली स्नेही लोक उपस्थित छलथि।