एसपी शैशव यादव बतौलनि जे ४ मार्चकेँ सूचना भेटल जे कुमियाही, थाना-त्रिवेणीगंजसँ जिलाक शीर्ष १० मे सूचीबद्ध अपराधी सुमन कुमार यादव आ ओकर गिरोहक सदस्य एकटा व्यक्तिके हत्याक साजिश रचि रहल अछि। सूचना भेटलाक बाद सत्यापन कएल गेल। एकर बाद जिला पुलिस आ एसटीएफ टीम द्वारा संयुक्त छापा मारल गेल। कुमियाहीसँ सुमन कुमार यादव, कड़हरवासँ राहुल कुमार, आ कुपरिया वार्ड नंबर 13 सँ राहुल कुमारकेँ थाना-त्रिवेणीगंजसँ हिरासतमे लेल गेल। ओकर सबहक लगसँ एकटा पिस्तौल, तीनटा देसी बन्दूक, तीनटा कारतूस, आ एकटा खोखा जब्त कयल गेल अछि।
टीम आगू कारवाई करैत गिरोहक आन सदस्यकेँ पकड़लक। हरिहरपट्टी वार्ड नंबर 05, थाना-त्रिवेणीगंजसँ प्रवीण कुमार एकटा पिस्तौल आ दूटा कारतूसक संग, आ कुमियाही वार्ड नंबर 11 सँ नीतीश कुमार, लक्ष्मीपुरसँ रूपेश कुमारकेँ पकड़लक। हिरासतमे लेल गेल सुमन कुमार यादव जिलाक शीर्ष १० अपराधीमे सँ एक अछि। बादमे सभ अपराधीकेँ न्यायिक हिरासतमे पठा देल गेल।
गिरफ्तार अपराधी सभसँ १०टा मोबाइल फोन आ एकटा बाइक सेहो जब्त कयल गेल अछि। जानकारक कहब छनि जे पुलिस मोबाइल फोनक माध्यमसँ आन अपराधी तक पहुँचि सकैत अछि।
छापा दलमे एसडीपीओ त्रिवेणीगंज बिपिन कुमार, थाना प्रमुख त्रिवेणीगंज रामसेवक रावत, थानाध्यक्ष राघोपुर नवीन कुमार, प्रभारी डीआईयू सेल संजय यादव, अपर थानाध्यक्ष राहुल कुमार, कांस्टेबल राम बहादुर सिंह, एसओजी टीम 12, डीआईयू सेल आ अन्य पुलिस कर्मी शामिल छलथि।
