बिहारक सीवानमे बालिका गृहसँ तेरहटा किशोरी भागि गेल। जांच शुरू कएल जा चुकल अछि, प्रशासनिक जांच रिपोर्टक आधार पर बालिका गृहक कर्मी सभ पर कारवाईक बात कहल गेल अछि।
सीवानक जीरादेई प्रखंड स्थित भैसाखाल गाममे बनल बालिका गृहसँ 13 किशोरी भागबाक मामिला सामने आएल अछि। उँच चहारदीवारीक संगहि कड़ा सुरक्षा प्रणालीक बावजूद रात्रिक अन्हरियामे किशोरी बाहर निकलि गेलीह। लड़की सभक भागबाक घटनाक बाद पुलिस आ प्रशासनिक जांच शुरू भ’ गेल अछि। एहि ठामसँ भागल किशोरी सभमे अधिकांश गोपालगंज आ सारण जिलाक छथि।
घटना 19 मार्चक मध्य रात्रि लगभग एक बजे केर बताओल जा रहल अछि। एहि बीच एखनि धरि दू किशोरीकेँ बरामद करबाक बात सामने आबि रहल अछि। हालाँकि सम्पूर्ण मामिला पर प्रशासनिक अमला किछु बाजयसँ कतरा रहल अछि।
समाज कल्याण विभागक अंतर्गत बाल संरक्षण इकाईक माध्यमसँ जिलाक जीरादेई थाना क्षेत्रक भैंसाखालमे बालिका गृह संचालित अछि, जतय विभिन्न मामिलामे बरामद नाबालिग ल़ड़कीसभकेँ राखल गेल अछि। प्रशासनक कहब अछि जे एहिमे सँ 13 किशोरीसभ एतय तैनात कर्मीसभ आ सुरक्षा गार्डकेँ चकमा दऽ कऽ फरार भ’ गेली। एकर सूचना दोसर दिन वार्डन रिंकु झा जीरादेई थानाकेँ देलनि संगहि विभागीय अधिकारीसभकेँ सेहो जनेलनि। एकर बाद पुलिस छानबीन शुरू कए देलक।
फरार किशोरीसभमे अधिकांश आक्रेस्ट्रामे काज करऽ वाली नर्तकीसभक अतिरिक्त एहेन नाबालिग सभ अछि, जे विवाहक झांसा दऽ कऽ बहला फुसलाक पूर्वमे भगाओल गेल छथि। एहि किशोरीसभक घरसभ तक पुलिस टीम पठाओल जायत। ई घटना जिलाक अधिकारीसभक कान ठाढ़ क’ देलक अछि।
एहि बीच पूरा मामिलाक जांच डीएम मुकुल कुमार गुप्ता द्वारा सदर एसडीओ सुनील कुमारकेँ सौंपल गेल अछि, जिनकर रिपोर्टक आधार पर विभागीय आ कानूनी कारवाई सेहो कयल जायत। हालाँकि टीम गठित क’ एसडीओ एहि घटनाक तमाम बिंदु पर जांच पड़ताल क’ रहल छथि।
