फेर एकटा पुल खसल। बिहारक सिवान जिलामे गंडक नदी पर बनल एकटा पुरान पुल शनिदिन खसि पड़ल। पुल देखिते-देखिते गंडक नहरमे खसि पड़ल। पुल बीचसँ दू टुकड़ामे बँटि नहरमे खसि पड़ल। मुदा, एहि घटनामे कियो घायल नहिं भेल। एहि घटनाक वीडियो तेजीसँ वायरल भऽ रहल अछि। ई दुर्घटना दरौंदा ब्लॉकक रामगढ़ा पंचायतक बताओल जा रहल अछि। राष्ट्रीय जनता दल सरकार पर पुल ढ़हबाक घटना पर भ्रष्टाचारक आरोप लगबैत हमला कयलक अछि।
सिवानमे गंडक नहरि पर एकटा पुल ढ़हि गेल अछि जाहिसँ दुनू दिससँ गुजरय बला लोकक सड़क अवरुद्ध भऽ गेल अछि। लोक बहुत समस्याक सामना कए रहल छथि। एहि पुलक ढहलासँ महाराजगंज प्रखंडक पटेढ़ी बाजार आ दरौंदा प्रखण्डक रामगढ़ा पंचायतक बीचक सम्पर्क सेहो टूटि गेल अछि। एहि मार्गकेँ पूरा करबाक लेल लोक सभकेँ लम्बा मार्ग तय करय पड़ि रहल अछि आ एहिमे बेसी समय सेहो लागि रहल अछि।
मुख्य विपक्षी दल राष्ट्रीय जनता दल (राजद) सिवानमे पुल ढहलापर विरोधक आवाज तेज कऽ देलक अछि। विपक्ष भ्रष्टाचारक मुद्दा पर बिहारक एनडीए सरकारकेँ घेरबाक प्रयास कयलक। राजद एकटा ट्वीटमे आरोप लगओलक अछि जे ‘डबल इंजन सरकारक कारनामे देखू। प्रत्येक सप्ताह पुल ढहनाइ १००% निश्चित मानल जाइत अछि। कमीशनखोरी, नौकरशाही आ भ्रष्टाचारक दुर्लभ प्रदर्शन दुनियामे कतहु अन्यत्र देखि नहिं सकब।
