अमेरिका ईरानक तीन परमाणु अड्डा- फोर्डो, नतांज आ इस्फाहानकेँ निशाना बनैलक अछि। एही हमलाक जवाबमे ईरान इजरायलक आर्थिक राजधानी तेल अवीव आ हाइफा शहर सहित इजरायलक १० शहरकेँ निशाना बनाबैत मिसाइल हमला कयलक।
निर्वासित युवराज रेजा शाह पहलवी एहि हमला पर बयान देलनि। ओ अमेरिकी हमला लेल इस्लामिक गणराज्यक परमाणु महत्वाकांक्षाकेँ जिम्मेदार ठहराबय केर संग-संग सर्वोच्च नेता खामेनी केर इस्तीफाक मांग कयलनि अछि।
ईरान-इजरायल युद्धमे जे आशंका छल से भऽ गेल अछि। अमेरिका तेहरान पर हमला कयलक अछि। अमेरिकी सैनिक ईरान केर तीन परमाणु अड्डाकेँ तबाह कऽ देलक अछि। अमेरिकाक एहि हमला पर दुनियाभरिसँ प्रतिक्रिया आबि रहल अछि। आब निर्वासित युवराज रेजा शाह पहलवी एहि हमला पर बयान देलनि अछि। ओ कहलनि जे शांति एहि शासनकेँ समाप्त करबाक एकमात्र निश्चित तरीका अछि।
जनतब जे रेजा शाह पहलवी, शाह मोहम्मद रेजा पहलवीक पुत्र छथि जे ईरानमे बहुत दिन धरि सत्तामे रहल छलथि। ईरानमे १९७९ धरि सत्ता केर बागडोर संभालि कय रखलनि, मुदा ३७ साल पहिने जे क्रांति भेल से ईरान केर धार्मिक-सामाजिक ताना-बानाकेँ पूरा तरहसँ बदैल देलक। क्रान्तिक परिणामस्वरूप शाह मोहम्मद रेजा पहलवी अपन जान बचाबय लेल मिस्र भागय लेल मजबूर भऽ गेलाह।
