मिथिलाक्षर साक्षरता अभियानक ग्यारहम स्थापना दिवस पाक्षिक समारोह पन्द्रहम दिन यानि ९ अक्टूबर (मिथिलाक्षर दिवस) संध्या कालीन प्रोग्रामक समापन दिन छल। ई पाक्षिक समारोह १५ दिनसॅं चलि रहल छल।
संस्थापक अजय नाथ झा शास्त्री कहलनि, “देवी नवरात्रिक कारण पुरा मिथिलाक्षर पक्ष प्रायः भक्तिमय रहल। यद्यपि एहि बेर व्यस्तताक कारण बहुत रास अतिथि कलाकारकेँ बजा नहिं सकलौंह, आइ-काल्हि करैत रहि गेलौंह आ समय बीत गेल, तथापि वरिष्ठ संरक्षक शंभु नाथ झा कतेको अतिथि कलाकारकेँ उपस्थित कयलाह।”
समापन दिन अंजू झा संस्कृतमे गणेश वन्दनाक स्तोत्रसँ शुभारंभ कयलनि। बहुत सुंदर आ स्पष्ट आवाजमे अपन प्रस्तुति देलैनि। राधा कुमारी सामा-चकेबा आ चुगला गीतक संग सब श्रोताकेँ मंत्रमुग्ध कयलनि। आभा मल्लिक भगवती गीत प्रस्तुत कयलनि। प्रदीप कुमार मल्लिक परिछन आ भगवती गीत प्रस्तुत कयलनि। शंभु नाथ झा भोला बाबाक नचारी गउलनि। सुधीर यादव मैथिली लोकगीत प्रस्तुत कयलनि। इन्द्र देव चौधरी भोला बाबाक समदाउन प्रस्तुत कयलैन।
पुनः अयलीह श्वेता झा आ अपन भावनृत्यसॅं सभ दर्शक श्रोताकेँ मंत्रमुग्ध कयलनि। श्वेता झाक भावनृत्य समारोहक मुख्य आकर्षक रहल, प्रसंशनीय रहल।
दयाराम प्रसाद अपनहिं अंदाजमे सभ दिनक भांति अपन स्वरचित कविता पाठ कयलनि।
पुनः आउलाह अतिथि कलाकार दिलीप कुमार मंडल, समारोहक संचालक कहलनि जे “दिलीप कुमार मंडलकें आब अतिथि कलाकार कहब उचित नहिं, ई सभदिन आबि समारोहक दृष्टिकोणसँ लागल जे अभियानक मजबुत अभियानी बनि गेलाह, मिथिलाक्षर पक्षक ई मैन ऑफ द सीरीज रहलाह।” दिलीप कुमार मंडल अबिते भगवती गीत प्रस्तुत कय सभकेँ मंत्रमुग्ध कयलैनि। पुनः झमकौआ लोक गीत आदि गउलनि।
कार्यक्रमक संचालक देवेन्द्र झा कहलनि, “पाक्षिक समारोहक कोना १५ दिन बीति गेल बुझबे नहिं कयलौंह। एहि पाक्षिक समारोहमे अभियानी लोकनि बहुत नीक ढंग आ नव उत्साहक संग अपन-अपन प्रस्तुत कयलनि।”
समारोहक समापनक धन्यवाद ज्ञापन वरिष्ठ संरक्षक शंभु नाथ झा कयलनि। संचालक देवेन्द्र झा कहलनि एहि प्रोग्राममे लगातार शंभु नाथ झा लागल रहलाह, जतेक अतिथि कलाकार भाग लेलनि से हिनके प्रतापसँ। संगहि संचालक देवेन्द्र झा व्यवस्थामे लागल वरिष्ठ संरक्षिका रुनू मिश्रा, वरिष्ठ संरक्षक नवीन झा, टेक्निकल विभागक योद्धा दीपक आनंद मल्लिक एवं संजय मिश्राक संग-संग समस्त सहभागी गण सराहनाक पात्र छथि। संस्थापक अजय नाथ झा शास्त्री पुरा मिथिलाक्षर पक्षक शानदार संचालन लेल वरिष्ठ संरक्षक देवेन्द्र झाक प्रति कृतज्ञता व्यक्त कयलनि, संगहि व्यवस्थामे लागल सभगोटेकेँ, तन-मन-धनसँ सहयोग देबयवाला सहयोगीगणकेँ, टेक्निकल टीमकेँ आ कलाकार, दर्शक-श्रोता एवं समस्त हितचिंतकक प्रति आभार व्यक्त कयलनि। त्रुटिक लेल क्षमा ज्ञापित कयलनि, संगहिसंग एक्स परक शानदार ट्विटर ट्रेंड, जे देशमे तेसर स्थान पर रहल, ताहि लेल अभियानी सहित समस्त मिथिलावासीक हृदयसँ आभार प्रकट कयलनि।
