समकालीन पत्रकारिताक क्षेत्रमे मैथिलीकें अलग पहिचान दियोनिहार अनेकों मैथिली पत्रिका केर संपादक रहि चुकल साहित्यकार आ शेखर प्रकाशन केर सर्वेसर्वा शरदिन्दु चौधरी केर निधन बुधदिन 71 वर्खक आयुमे भऽ गेलनि। ओ पछिला किछु माससँ गंभीर बीमारीसँ पीड़ित रहथि।
हिनकर जन्म दरभंगा शहरक मिश्रटोलामे 7 अक्टूबर 1956 कें भेल छलनि। ओ जीवन पर्यंत मिथिला, मैथिली आ मैथिली पत्रकारिता केर यथोचित विकास लेल समर्पित रहलाह। हुनका निधन केर सूचना भेटिते संपूर्ण मिथिलामे शोकक लहरि पसरि गेल अछि।
आधुनिक चकाचौंधसँ दूर ओ अपन बैसकी किताबक दोकान पर अंत धरि कायम रखलाह। जतय सदिखन मैथिली केर लेखक आ मैथिली पढ़निहार छात्रक मजमा लागल रहैत छल। ई दोकान पटना जंक्शन केर समीप स्थित बाजारमे छल। दोकानक नाम शेखर प्रकाशन छल। यानी ओ प्रकाशक छलाह। मुदा प्रकाशक सेहो एहि लेल जे मैथिलीक रचना निर्वाध गतिसँ प्रकाशित होइत रहय। जाहि लेखककें अपन रचना छपेबामे दिक्कत होइत छलनि, हुनका लेल शेखर प्रकाशन छल। यानी ओतय प्रकाशन केर नाम पर कोन व्यावसायिक सरोकार नहि छल। किताब सेहो केवल मैथिली साहित्यक नहि, मैथिलीक पाठ्य पुस्तक सेहो होइत छल। किताब केवल शेखर प्रकाशनक सेहो नहि, मैथिलीमे कतहु छपल हो, एतय आसानीसँ उपलब्ध रहैत छल। ओ मैथिली केर वीकिपीडिया छलाह।
