प्रखंड क्षेत्रक शक्ति पीठ माँ जगदम्बा धाम नवादाक प्रांगणमे सात सूत्री मांगक समर्थनमे पूर्व निर्धारित आमरण अनशन आ सत्याग्रह गणपति झा केर नेतृत्वमे प्रारम्भ भेल । सत्याग्रहकें सम्बोधित करैत पूर्व जिला पार्षद रामकुमार झा उर्फ बबलू कहलनि जे मनोकामना भगवतीक रूपमे विख्यात वरदायनी, लोक मंगलकारणी मिथिला शक्तिपीठ माँ जगदम्बा धाम नवादा लाखो भक्तक आस्थाक केंद्र अछि । एखनिधरि एहि मंदिरकेँ राजकीय तीर्थ स्थल घोषित नहि केनाइ , सरकारी उपेक्षाक सूचक आ दुर्भाग्यपूर्ण अछि । सरकार एहि मंदिरकेँ राजकीय तीर्थ स्थल घोषित कय पर्यटकीय विकास करय। वर्तमान न्यास समिति यात्री सुरक्षा देबामें अक्षम अछि जाहि कारणे विकास बाधित अछि। विधि व्यवस्था चरमरा गेल अछि । पूर्ण आ पारदर्शी विकासक लेल न्यास समितिक पुनर्गठन विधिवत कयल जाय।
सत्याग्रहमे न्यास समितिक सदस्य बुधियार यादव , प्रेमशंकर झा , अशोक बाबा , धीरेंन्द्र झा , शोभा देवी , हरिश्चन्द्र सदा , सुनील चौधरी , कृष्णकांत झा सहित दर्जनो लोक मौजूद छलाह।
