केंद्रीय गृहमंत्री अमित शाह शुक्रकेँ प्रधानमंत्री नरेंद्र मोदी आओर हुनकर नेतृत्व वला सरकारक प्रशंसा करैत कहलनि, नरेंद्र मोदीक सरकार देशमे स्वास्थ्य संबंधी समस्याक समाधान समग्र दृष्टिकोणसँ कयलक अछि। शाह ई बात बेंगलुरुमे आदिचुंचनागिरी विश्वविद्यालयक नवका परिसरक उद्घाटनमे कहलनि।
ओ कहलनि, हमर नेता नरेंद्र मोदी कतेको साल पहिने गुजरातमे कहने छलाह जे गरीबक सबसँ पैघ समस्या बीमारी आ इलाज पर खर्च अछि। सरकारकेँ गरीबक जिम्मेदारी लेबाक चाही। आइ हमरा गर्व अछि जे प्रधानमंत्री बनलाक बाद मोदीजी 60 करोड़ गरीब लोककेँ हर साल 5 लाख रुपया धरिक मुफ्त इलाजक व्यवस्था कयलनि अछि।
शाह कहलनि, मोदी सरकार स्वास्थ्यसं जुड़ल बहुत रास पहल शुरू कयलक अछि, जाहिमे 12 करोड़ घरमे शौचालय केर निर्माण, फिट इंडिया मूवमेंट, योग दिवस, मिशन इंद्रधनुष, पोषण अभियान, आयुष्मान भारत आ भारतीय जन-औषधि परियोजना शामिल अछि। ओ कहलनि, सरकार ई सुनिश्चित कय रहल अछि जे कोनो नागरिकक माताक गर्भमे जन्मक समयसँ लऽ कऽ पूर्ण नागरिक बनय धरि कोनो तरहक बीमारी नहि होय आ बीमार पड़ला पर ओकर इलाज महग नहि होयबाक चाही।
गृहमंत्री इहो कहलनि जे देशमे डॉक्टरक संख्या बढ़ेबाक लेल पैघ डेग उठाओल जा रहल अछि। 2014 मे देशमे 7टा एम्स छल, आब 23टा एम्स अछि। मेडिकल कॉलेजक संख्या 387 सँ बढ़ि कए 780 भऽ गेल अछि। ओ कहलनि, 2014 मे एमबीबीएसक संख्या 51 हजार छल, आइ ई संख्या बढ़ि कए 1,18,000 भऽ गेल अछि। पीजी सीट 31 हजारसँ बढ़ि कए 74 हजार भऽ गेल अछि। मतलब देशमे हर साल भारी संख्यामे एमबीबीएस डॉक्टर आ स्पेशलिस्ट डॉक्टरकेँ प्रशिक्षित कयल जा रहल अछि।
एहि आयोजनमे केंद्रक भारी उद्योग आ इस्पात मंत्री एचडी कुमारस्वामी, रेल राज्य मंत्री आ जल शक्ति वी सोमन्ना आ आदिचुंचनागिरी मठक निर्मलानंदनाथ महास्वामीजी सेहो मौजूद छलाह।
ओम्हर केरलक उच्च शिक्षा मंत्री आर.बिन्दु आ सामान्य शिक्षा मंत्री वी. सिवंकुट्टी केंद्रीय गृहमंत्री शाहक कथित अंग्रेजी विरोधी बयानक आलोचना कयलनि। ओ कहलनि, एहिमे ‘संकीर्ण’ राजनीतिक दृष्टिकोणक झलक भेटैत अछि। ओ एकरा निन्दनीय कहलनि। आर.बिन्दू कहलनि जे अंग्रेजी दुनियामे सबसँ बेसी प्रयुक्त भाषा अछि, चाहे ओ व्यक्तिगत गप्प-सप्प होय वा इंटरनेट पर संवाद। ओ कहलनि जे ‘बच्चाकेँ अंग्रेजी नहि सीखबाक चाही, ई शर्मिंदगीक कारण होएत’, ई विचार बच्चा सभक दुनियाकेँ आओर सीमित करत। भारत कोनो अलग-थलग द्वीप नहिं अछि, तें अंग्रेजी सीखब आइ एकटा आवश्यकता बनि गेल अछि।
