साधारण देखाई बला असाधारण व्यक्ति छलाह गाँधी आ शास्त्री : प्रो दिलीप कुमार चौधरी

दिवस विशेष पर एनसीसी कैडेट्स कयलक पौधरोपण
*
दरभंगा समदिया
*

राष्ट्रपिता महात्मा गांधी आ पूर्व प्रधानमंत्री लाल बहादुर शास्त्री जीक जयंती पर सीएम साइंस कॉलेज केर प्रधानाचार्य प्रो दिलीप कुमार चौधरी बुधदिन दूनू नेताकें भाव भरल श्रद्धांजलि अर्पित कयलनि। अपन संदेशमे ओ कहलनि जे महात्मा गांधी आ लाल बहादुर शास्त्रीमे एक बात केर समानता छल जे एहि दूनू नेताकेँ शांति, अहिंसा आ देशक आजादीक प्रति आत्मीयलगाव छलनि। हिनक दूनू केर विचार नहिं मात्र देशक अभूतपूर्व मार्गदर्शन कयलक, अपितु संपूर्ण विश्वकें सेहो अहिंसाक बाट देखेलक। गाँधी आ शास्त्री एकटा साधारण सन देखाई देनिहार असाधारण व्यक्ति छलाह । जे अपन अहिंसावादी सोच आ सिद्धांतसँ देशक सत्ता बदलि देने रहथि ।

ओ कहलनि जे गांधीजी जतय संपूर्ण विश्व कें शांति आ अहिंसाक पाठ पढ़ेलनि ओतहि, शास्त्रीजी एकटा एहेन व्यक्ति रहथि जे युद्धक स्थितिमे सेहो देशक भीतर शांति व्यवस्थाकेँ बनौने रखबामे सफलता हासिल कऽ अद्वितीय नेतृत्व क्षमता केर परिचय देलनि। प्रधानमंत्रीक रूपमे हुनकर एक मात्र लक्ष्य भारत केर धर्मनिरपेक्ष आ मिश्रित अर्थव्यवस्थाक संग एकटा लोकतांत्रिक देश बनायब छल, जाहि लेल कयल गेल हुनक प्रयासकेँ लोक आइयो याद करैत अछि। अपन नीति केर अलावा हुनका एकटा एहन व्यक्तिक रूपमे जानल जाइत छनि, जिनकर भारत केर विकास लेल, लेल गेल महत्वपूर्ण फैसलामे अहम योगदान छलनि। ओ देशमे उत्पन्न भेल खाद्य संकट आ आकाल केर स्थितिक सेहो बहुत नीक तरीकासँ सामना कयलनि आ देशक स्वाभिमानकेँ बनौने रखलाह।

जयंती समारोहमे दूनू महापुरुषकेँ श्रद्धा सुमन अर्पित कयला उपरांत 1/8 कंपनी एनसीसी आ महाविद्यालय केर एनसीसी इकाई द्वारा ‘एक कैडेट, एक वृक्ष’ कार्यक्रम केर तहत महाविद्यालय परिसरमे पौधारोपण कयल गेल। मौका पर मौजूद सूबेदार मेजर मदन तमांग वृक्ष केर तुलना माँ सँ करैत कहलनि जे माँ आ वृक्ष हमरा निःस्वर्थ भावसँ छाया आ फल दैत अछि। एनसीसी पदाधिकारी लेफ्टिनेंट अभय सिंह कहलनि जे आइ बढ़ैत जनसंख्या केर कारण भारी संख्यामे वृक्षक कटाई कयल जा रहल अछि। जाहि कारण वातावरण असंतुलित भऽ रहल अछि। वृक्षक कटाई केर कारण वर्षा सेहो कम भऽ रहल अछि। जाहि कारण लोक कें पीबा योग्य पानि लेल तरसय पड़य पड़ि रहल अछि। प्रधानाचार्य बेसीसँ बेसी पौधारोपण आ वृक्षक सुरक्षा लेल कैडेट्सकें प्रोत्साहित कयलनि।

कार्यक्रममे पूर्व कैडेट सुशील कुमार, प्रशिक्षु जेसीओ जितेंद्र सिंह, हवलदार कुलदीप सिंह, सीनियर अंडर ऑफिसर विपिन कुमार, अंडर ऑफिसर मोहित कुमार, सार्जेंट अक्षित कुमार आदि बढ़ि चढ़ि कऽ हिस्सा लेलनि।