एतिहासिक सौराठ सभाक अवसर पर कला संस्कृति एवं युवा विभाग बिहार सरकार, जिला प्रशासन मधुबनी आ सौराठ सभा समितिक संयुक्त तत्वावधानमे ०५ एवं ०६ जूनकेँ द्विदिवसीय ‘सौराठ महोत्सव-२०२५’ केर आयोजन भेल।
*
मधुबनी समदिया
*
मिथिला क्षेत्रीय बिहार राज्यक मधुबनी जिलाक रहिका प्रखंडक अंतर्गत विश्व प्रसिद्ध ऐतिहासिक सौराठ सभासँ प्रायः सभगोटे परिचित छी। एहि बेर ई सभा २८ मईसँ ०६ जून धरि छल। एहि पावन अवसर पर एहि बेर कला संस्कृति एवं युवा विभाग बिहार सरकार, जिला प्रशासन मधुबनी आ सौराठ सभा समितिक संयुक्त तत्वावधानमे ०५ एवं ०६ जूनकेँ द्विदिवसीय ‘सौराठ महोत्सव-२०२५’ केर आयोजन भेल।
एहि ‘सौराठ महोत्सव-२०२५’ केर आयोजनमे काल्हि शुक्रकेँ मध्यान्ह १२:०० सँ अपराह्न ०२ बजे धरि ‘मिथिलाक्षर’ विषय पर सेमिनार छल, जाहिमे ‘मिथिलाक्षर साक्षरता अभियान’क सात टा अभियानी अपन दमदार प्रस्तुती देलनि। एहि अभियानीगणमे मिथिलाक्षर साक्षरता अभियानक संरक्षक आशीष मिश्र, संरक्षक दीपक कुमार झा, संरक्षक संजय झा, संरक्षिका संगीता मिश्र, संरक्षक संजय झा, मार्गदर्शक राकेश कुमार झा एवं मार्गदर्शक सुशील कुमार झा ‘चुन्नू’ सम्मिलित छलथि।
प्रखंड विकास पदाधिकारी (बीडीओ) रहिकाक दीपक कुमार, सौराठ सभा समितिक अध्यक्ष कृष्णकान्त झा ‘गुड्डू’ एवं सचिव एडवोकेट शेखर चंद्र मिश्र प्रतिभागीगणकेँ पाग आ अंगवस्त्रसँ सम्मानिति कयलनि। सौराठ पंचायतक मुखिया विभाकर झा’क उपस्थिती छल।
सेमिनारमे मुख्य वक्ता संरक्षक आशीष मिश्र मिथिलाक्षरक दशा ओ दिशा पर प्रभावी आ प्रेरित करयवाला वक्तव्य देलनि। मिथिलाक्षर लिपिक प्रादुर्भाव, प्राचीनता, विकासात्मक परिवर्तन, प्रचलन आ पुनः क्रमशः विलुप्तप्राय स्थिति आ तत्पश्चात एहि २१म शताब्दीमे ‘मिथिलाक्षर साक्षरता अभियान’ द्वारा ‘मिथिलाक्षर क्रान्ति’ आनि पुनः मिथिलाक्षरक उदय आ व्यवहार पथ दिसि बढ़ब पर अपन बुलंद आवाजमे प्रकाश देलनि।
अन्य वक्ता अभियानी सभ सेहो अपन-अपन विचार रखलनि आ मिथिलाक्षरकेँ पहिने जँका प्रचलनमे आनय लेल प्रयास पर प्रकाश देलनि, ‘मिथिलाक्षर साक्षरता अभियानसँ जुड़ि मिथिलाक्षर सिखू-सिखाउ अभियानकेँ साकार करय केर मार्ग देखेलनि।
द्विदिवसीय सौराठ महोत्सवक दोसर दिन काल्हि शुक्रकेँ अन्य कार्यक्रम सभमे ‘पंजी प्रथा पर सेमिनार’, कवि गोष्ठी, मिथिला पेंटिंग प्रतियोगिता, क्विज प्रतियोगिता एवं संध्या काल चर्चित आ प्रसिद्ध कलाकार सभ द्वारा सांस्कृतिक कार्यक्रम छल।
एहि द्विदिवसीय सौराठ महोत्सवक मुख्य अतिथिमे लेशी सिंह (मंत्री खाद्य एवं उपभोक्ता संरक्षण बिहार सरकार) एवं मोतीलाल प्रसाद (मंत्री कला, संस्कृति एवं युवा विभाग बिहार सरकार) छलथि।
विशिष्ट अतिथि सभमे -:
नीतीश मिश्रा (उद्योग मंत्री बिहार), शीला कुमारी (परिवहन मंत्री बिहार), संजय कुमार झा (राज्यसभा सांसद), डाॅ. फैयाज अहमद (राज्यसभा सांसद), अशोक यादव (सांसद लोकसभा), रामप्रीत मंडल (सांसद लोकसभा), डाॅ. मदन मोहन झा (एमएलसी बिहार), सर्वेश कुमार सिंह (एमएलसी बिहार), घनश्याम ठाकुर (एमएलसी बिहार), अम्बिका गुलाब यादव (एमएलसी बिहार), समीर कुमार महासेठ (एमएलए बिहार), विनोद नारायण झा (एमएलए बिहार), डाॅ. रामप्रीत पासवान (एमएलए बिहार), हरिभूषण ठाकुर ‘बचौल’ (एमएलए बिहार), अरुण शंकर प्रसाद (एमएलए बिहार), सुधांशु शेखर (एमएलए बिहार), मीना कुमारी (एमएलए बिहार), भरत भूषण मंडल (एमएलए बिहार), बिन्दु गुलाब यादव (मधुबनी जिला परिषद अध्यक्ष) एवं अरुण राय (मधुबनी नगर निगम मुख्य पार्षद) छलथि।
