बिहारी एकता मंच चेम्बूर, द्वारा हर वर्षक भांति लगातार पच्चीसम वर्ष भव्य सार्वजनिक सरस्वती पूजा महोत्सवक आयोजन भक्तिपूर्ण वातावरणमे संपन्न भेल। संस्था द्वारा हर वर्ष वसंत पंचमीक शुभ अवसर पर माँ शारदेक पूजन कएल जाइत रहल अछि। एहि अवसर पर संस्था द्वारा लोकसेवाक अनेको कार्य भेल अछि। सस्न्था द्वारा मेडिकल कैम्प लगाओल जाइत अछि, जतय आम जनमानस, अनुभवी चिकित्सकक देखरेखमे निशुल्क स्वास्थ्य जाँच करबैत छथि।
शीतला माता मंदिर प्रांगण (चेम्बूर कैंप) में बिहारी एकता मंच हर वर्ष सार्वजनिक सरस्वती पूजाक आयोजन करैत रहल अछि। संस्थाक अध्यक्ष कौशल कुमार मिश्र जानकारी दैत कहलनि कि, दिनांक 3/2/2025 (सोमदिन) भगवतीक स्थापनाक संग पूजन प्रारम्भ भेल संगहि मिथिलापुरी कीर्तन मंडली चेम्बूर द्वारा विजय कुमार मिश्र (गोकुलजी) द्वारा अखंड हरिनाम अष्टयाम संकीर्तन सेहो शुरू भेल, जाहिमे अनेको कीर्तन मंडली द्वारा नाम संकीर्तन कएल गेल। अत्यंत भक्तिपूर्ण वातावरणमे पूजन प्रक्रिया संपन्न भेल।
दोसर दिन दिनांक 4/2/2025 (मंगलदिन) पूजा आरती एवं हवनके संग विसर्जन भेल संगहि श्रद्धालु लोकनि लेल विशाल महाभंडाराक आयोजन सेहो संपन्न भेल। एहि अवसर पर भव्य भजन एवं सांस्कृतिक कार्यक्रमक आयोजन सेहो राखल गेल छल, जाहिमे मैथिल कलाकार अलका झा, श्रुति झा, घनश्यामजी एवं संजीव झा अप्पन प्रस्तुतिसँ उपस्थित श्रद्धालु लोकनिकेँ मंत्रमुग्ध कएलनि। संस्थाक पच्चीसम वर्ष पूर्ण भेलाक अवसर पर संस्था द्वारा अनेको गणमान्य समाजसेवीकेँ प्रशस्तिपत्र एवं पारम्परिक पाग दोपटासँ सम्मानित सेहो कएल गेल। एहि सफल आयोजन लेल संस्थाक तमाम सेवाधारी जाहिमे, प्रदीप मिश्र, विश्वनाथ झा, नारायण झा, शम्भू ठाकुर, अशोक ठाकुर, बिपिन झा, केदार झा, पशुपति झा दिन्द्र गुप्ता, अमित कुमार झा, मोहन झा, आनंद मिश्र, संगहि तमाम कार्यकर्ता तत्पर छलथि।
