साओनक पहिल सोमदिन मिथिला क्षेत्रीय बिहारक भागलपुर जिलामे ११ गोटे डूबि गेलाह। मुदा, बादमे ७ लोककेँ बचा लेल गेल, जखन कि ४ गोटेक मृत्यु भऽ गेल।
जिलामे साओनक पहिल सोमदिन एकटा पैघ दुर्घटना भेल अछि। एतय रविदिन राति १ बजे गंगा घाट पर जल भरबाक लेल आयल ११ गोटे मित्र डूबि गेलाह। स्थानीय लोक सबकेँ बचाबए केर कोशिश कयलक। गोताखोरकेँ सेहो हड़बड़ीमे सूचना देल गेल। बहुत मेहनतक बाद सभकेँ बाहर निकालल गेल, मुदा जाबत धरि सभकेँ बाहर निकालल गेल, ओहिमे चारिटा मित्रक मृत्यु भऽ गेल छल। प्राप्त जानकारीक अनुसार ७ टा लड़काकेँ बचा लेल गेल अछि। संगहि एहि घटनाक बादसँ मृतकक परिवारमे शोक पसरल अछि। पुलिसक एकटा टीम सेहो घटनास्थल पर पहुँचि गेल अछि आ मामिलाक जाँच कयल जा रहल अछि।
दरअसल, भवानीपुर थाना क्षेत्रक मधुरापुर गंगा जहाज घाटक इ पूरा मामला अछि। कहल जा रहल अछि जे गंगा घाट पर जल भरबा लेल ११ गोट मित्र एक संग गेल छलाह। हिनकर सबहक पहिचान नवगाछिया थाना क्षेत्रक नया टोलाक निवासीक रूपमे भेल अछि। मृतमे दूटा नाबालिग सेहो शामिल अछि।
घटनास्थल पर उपस्थित मृतकक एकटा परिजन बतौलनि जे नवगछिया नया टोला गामक ११ गोट मित्र साओनक पहिल सोम दिन गंगामे स्नान करय लेल मधुरापुर गंगा जहाज घाट आयल छलाह। एतय गहींर पानिमे जयबाक कारणेँ सभ गोटे डूबय लगलाह। स्थानीय लोकक मदतिसँ ७ गोट मित्रकेँ बचा लेल गेल, जखन कि चारिटा मित्रक मृत्यु भऽ गेल।
ओतहि भवानीपुर थानाक अध्यक्ष निरीक्षक महेश कुमार, क्षेत्राधिकारी विशाल अग्रवाल, आरओ भरत कुमार झा सहित कतेको अधिकारी घटनास्थल पर पहुँचि गेल छलथि। घटनाक सूचना भेटलाक बाद पैघ संख्यामे श्रद्धालु घटनास्थल पर जमा भऽ गेलाह। सूचना भेटलाक बाद क्षेत्रीय अधिकारी सेहो घटनास्थल पर पहुँचलाह आ मामिलाक जाँच कयल जा रहल छल। जनतब जे दुर्घटनाक बाद भक्त सभ डरि गेल छथि।