अंघराठाढ़ी प्रखंड स्थित सिजौलमे स्थापित संदीप विश्वविद्यालय श्रीराम पाॅलिटेक्निक मात्र मधुबनीक लेल नहि बल्कि बिहारक लेल गौरवक विषय बनि चुकल अछि। श्रीराम पाॅलिटेक्निक काॅलेज सिविल आओर पाॅलिटेक्निक एनबीए एक्रिडेशनक मान्यता प्राप्त कयलक। उक्त जानकारी संदीप फाउंडेशनक चेयरमैन डाॅ. संदीप झा सिजौल स्थित बीएड काॅलेजक सभागारमे आयोजित प्रेसवार्तामे देलनि। इंजीनियरिंग काॅलेज खोलबाक लेल एआईसीटीसँ मान्यता प्राप्त करय पड़ैत छैक। काॅलेज बनलाक उपरांत एकर शैक्षणिक गुणवत्ता अर्थात् स्टेन्डर्स तकनीकी, इन्फ्रास्ट्रक्चर, लेबोरेट्री, उच्च क्वालिटीक प्लेसमेंट समेत समाजमे शत-प्रतिशत छात्र/छात्राके लाभ प्राप्त भऽ सकय, एहि विषय पर विशेष ध्यान राखल जाइत अछि। राष्ट्रीय प्रत्यायन बोर्ड एनबीए द्वारा ग्रामीण क्षेत्रक छात्र/छात्राकेँ मिथिलाक धरती पर संदीप फाउंडेशन श्रीराम पाॅलिटेक्निक केर माध्यमे तकनीकी शिक्षा प्रदान करेबाक गुणात्मक क्षमताक सराहना कयल गेल अछि। प्रेसकेँ संबोधित करैत डाॅ. झा कहलनि जे ई उपलब्धि मिथिला तथा बिहारक लेल गौरवक विषय अछि।
जनतब दी जे एनबीए एक्सपर्ट टीम द्वारा तीन दिवसीय जाँच कयला उपरांत बिहारक पहिल पाॅलिटेक्निक कओलेजक श्रेणीमे श्रीराम पाॅलिटेक्निककेँ मान्यता देल गेल। एहेन उपलब्धिक श्रेय कओलेजक प्राचार्य प्रो. चन्द्र प्रकाश समेत संस्थानक शिक्षक तथा कर्मचारीक सामूहिक परिश्रमक फलस्वरूप भेटल अछि। डाॅ. झा कहलनि जे द्रुतगतिसँ बदलैत डिजिटल तथा युगान्तकारी यात्रामे श्रीराम पाॅलिटेक्निक प्रौद्योगिकी केर माध्यमें छात्र/छात्राक कार्य कुशलतामे अप्रत्याशित सुधार होयत। भारत प्रौद्योगिकी क्षेत्रमे दुनियाक सबसँ तेज गतिसँ बढ़ैत अर्थव्यवस्थामे उत्प्रेरकक रूपमे महत्वपूर्ण भूमिकाक निर्वहन कऽ रहल अछि।
श्रीराम पाॅलिटेक्निकक वर्तमान सत्र २०२४-२०२५ मे कम्प्यूटर साइंस एवम् टेक्नोलॉजीक पढ़ाईक शुभारंभ कयल जायत। एआईसीटी द्वारा १२० (एक सय बीस) सीटक मान्यता देल गेल अछि। आबयवला समयमे मिथिला समेत बिहारक शिक्षा क्षेत्रमे पैघ बदलाव हेबाक संभावना अछि।
