सम्राट चौधरी बिहारक अगिला मुख्यमंत्री : सीएम नीतीशक इशारा

जमुई। समदिया

बिहारक मुख्यमंत्री नीतीश कुमार समृद्धि यात्राक दौरान बुधदिन जमुई पहुंचलाह। मंच पर उपमुख्यमंत्री सम्राट चौधरी सेहो उपस्थित छलाह। एहि दौरान नीतीश बिहारक अगिला मुख्यमंत्रीक बारेमे एकटा महत्वपूर्ण संकेत देलथि। सम्राट चौधरीक कान्ह पर हाथ राखि लोक सभसँ समर्थनमे हाथ उठबौलनि। सीएम घोषणा कयलनि जे आब “सम्राट” सभटा काज सम्हारताह। आब सवाल उठैत अछि जे की नीतीश इ संदेश देबाक कोशिशमे छथि जे सम्राट चौधरी बिहारक अगिला मुख्यमंत्री हेताह? की मुख्यमंत्रीक लेल सम्राट चौधरी नीतीशक प्राथमिक पसंद छथि? की नीतीश जी इएह बताबयकेँ कोशिश करय छलाह? ज्ञातव्य जे नीतीश कुमार राज्यसभामे चुनल गेल छथि। हुनक कार्यकाल 10 अप्रैलसँ शुरू भ रहल अछि। अगिला मास ओ मुख्यमंत्री पदसँ इस्तीफा द सकैत छथि। एकर बाद बिहारमे नव सरकार बनत। एहि बेर भाजपाक मुख्यमंत्री होयत एकर संभावना प्रबल अछि। एहि क्रममे सम्राट चौधरीक संबंधमे नीतीश कुमारक बयान कतेको तरहेँ महत्वपूर्ण अछि। नीतीश कुमार एहि तरहक बात सम्राट चौधरीक बारेमे पहिल बेर नहि कयलाह। एखन किछुए दिन पहिने कटिहारमे एकटा कार्यक्रमक अंतमे मुख्यमंत्री उपमुख्यमंत्री सम्राट चौधरीक पीठ थपथपा देलथि। समृद्धि यात्राक तहत जमुई पहुंच नीतीश कुमार कुंडघाट जलाशय परियोजनाक उद्घाटन कयलनि, एहि स्थलक निरीक्षण कयलनि आ विभिन्न स्टॉलक दौरा कयलनि। काल्हि (बुधदिन) समृद्धि यात्राक चारिम चरणक दोसर दिन छल। काल्हि नवादामे मुख्यमंत्रीक कार्यक्रम सेहो छल। नीतीश कुमारकेँ दिल्ली (राज्यसभा) प्रस्थानसँ पहिने ई दौरा महत्वपूर्ण मानल जाइत अछि।