मिथिला क्षेत्रीय बिहारक समस्तीपुरक साक्षी कुमारी कहलनि जे सफलतामे माता-पिता आ गुरुजनक बहुत योगदान रहल अछि। विद्यालयक शिक्षकक मार्गदर्शनक कारणेँ हम टॉपर बनि पओलहुँ।
बिहार बोर्डक मैट्रिक परीक्षाक रिजल्ट शनिकेँ जारी कएल गेल अछि। समस्तीपुर जिलाक विभूतिपुर प्रखंड स्थित जेपीएन उच्च विद्यालय नहरनक छात्रा साक्षी कुमारी 489 अंक प्राप्त कऽ राज्य स्तर पर प्रथम स्थान प्राप्त कएलनि। 489 अंक लाबय वलामे तीन छात्र-छात्रा शामिल छथि। ओतहि स्कुलक छात्र प्रणव कुमार 486 अंक प्राप्त कऽ चतुर्थ स्थान प्राप्त कएलनि।
ओतहि बिहार बोर्डमे स्टेट टॉपर मिथिला क्षेत्रीय बिहारक समस्तीपुर जिलाक विभूतिपुर प्रखंड अंतर्गत जोगिया निवासी नरेश शर्माक पुत्री साक्षी कुमारी 489 अंक लऽ टॉपर लिस्टमे प्रथम स्थान प्राप्त कएलनि। साक्षीक पिता मजदूरी कऽ अपन घर चलाबैत छथि। प्रणव आ साक्षी संग नौ छात्र-छात्राक नाम टॉपर लिस्टमे सर्वप्रथम आयलाक कारण सम्पूर्ण जिलामे खुशीक लहर अछि।
साक्षी कुमारी कहलनि जे टॉपर बनिकय हुनका बहुत नीक लगैत अछि। हुनका विश्वास नहि होइछ जे ओ पहिल स्थान प्राप्त कयलनि। हुनकर सफलतामे माता-पिता आ गुरुजनक बहुत योगदान रहल अछि। विद्यालयक शिक्षकक मार्गदर्शन केर कारण ओ टॉपर बनि पाओल छथि। एखन तऽ ई पहिल पड़ाव अछि, आगु आर नीक करबाक अछि। कतेक घंटा पढ़ाई करबाक सवाल पर साक्षी कहलथि जे ओ समय देखिकय नहि पढ़ैत छलथि। जखनि मोन करैत छलनि तखन पढ़ाई करैत छलथि। सेल्फ स्टडी पर बेसी फोकस केलन्हि।
ओही ठाम चारिय स्थान पर प्रणव कुमार 486 अंक ल’ क’ टॉपरमे अपन स्थान बनौने छथि। ओहो जेपीएन उच्च विद्यालय नरहनक छात्र छथि। ओ खानपुर निवासी स्वर्गीय विजेंद्र राय आ ग्रिहणी विंध्यवासिनी देवी केर पुत्र छथि। ओ विभूतिपुर अपन नानीगाममे रहि परीक्षाक तैयारी करैत छलाह। हुनकर ई सफलता पर हुनकर शिक्षक मोती सर कहलथि जे लड़का बचपनेसँ मेधावी छात्र रहल छथि। ई अपने कठोर मेहनतिक बदौलत ई उपलब्धि प्राप्त कयलन्हि। प्रणव कहलथि जे ओ आगू चलिकय इंजीनियरिंगक तैयारी करए चाहैत छथि।
ओतहि एहि सफलता पर भाजपा नेता अरविंद कुमार कुशवाहा, बिहार राज्य माध्यमिक शिक्षक संघक सदस्य अरविंद कुमार दास, जिला परिषद सदस्य जितेंद्र राम समेत भारी संख्यामे पहुँचल ग्रामीणसभ छात्र-छात्रासभक घर जाए फूल, माला पहिरा कऽ सम्मानित कयलनि आ अभिनंदन एवं हार्दिक शुभकामना देलनि।
जनतब जे समस्तीपुर जिलाक जेपीएन उच्च विद्यालय नहरनक छात्रा साक्षी कुमारी 489 अंक, प्रणव कुमार 486 अंक प्राप्त कएलनि। जखनि कि जनता उच्च विद्यालय अख्तियारपुर चंदौलीक छात्र विवेक कुमार 483 अंक लए कऽ सातम स्थान पर, उच्च विद्यालय बढ़ौनाक छात्र अंकित कुमार 482 अंक लए कऽ आठम स्थान पर, एनआईएमएस उच्च विद्यालय हसनपुर रोडक छात्र सिद्धार्थ यदुवंशी 482 अंक प्राप्त कए कऽ आठम स्थान प्राप्त कयलथि।
ओतहि आरएनएस उच्च विद्यालय सिंघियाघाटक छात्र नंद किशोर कुमार 481 अंक प्राप्त कए कऽ नवम स्थान पर, सर्वोदय उच्च विद्यालय चांदचौर मथुरापुरक छात्र सुधांशु कुमार 481 अंक प्राप्त कए कऽ नवम स्थान पर, ताजपुर प्रखंड अंतर्गत उच्च विद्यालय बाघीक छात्रा सत्या कुमारी 480 अंक प्राप्त कए कऽ दशम स्थान, उत्क्रमित उच्च माध्यमिक विद्यालय लाटबसेपुरा सरायगंजक छात्र प्रिंस कुमार 480 अंक प्राप्त कऽ दशम स्थान प्राप्त कयलनि अछि।
