प्रधानमंत्री नरेन्द्र मोदी बृहस्पति दिन मिथिला क्षेत्रीय बिहारमे अपन चुनाव अभियानक शुरुआत जमुईक खैरासँ कयलनि। एहि दौरान जतय ओ दुनियामे भारतक बढ़ैत विश्वसनीयता पर विपक्ष पर जोरदार निशाना साधलनि। ओ कहलनि जे आजुक भारत बदलि गेल अछि, ई दुश्मनकेँ घरमे घुसि मारैत अछि।
विकासक लेल कयल गेल काजक विषयमे ओ कहलनि जे मोदीक सोच अलग अछि। ओ कहलनि जे १० सालमे जे काज भेल अछि ओ ट्रेलर अछि, बहुत किछु करबाक अछि।
जमुई लोकसभा क्षेत्रक बल्लोपुर मैदानमे एकटा चुनावी जनसभाकेँ संबोधित करैत पीएम मोदी कहलनि जे आइ देश बदलि रहल अछि आ बिहार एकर साक्षी अछि। जमुई नक्सलवादक लेल जानल जाइत छल।
ओ कहलनि जे अहाँक सपना हमर संकल्प अछि। बिहारकेँ आगू बढ़ेनाइ मोदीक गारंटी अछि। ओ स्पष्ट स्वरमे कहलनि जे घंमडिया गठबंधन बिहारक भला नहिं कऽ सकैत अछि। बिना केकरो नाम लेने, प्रधानमंत्री लालू प्रसादक लैंड फॉर जॉब मामिलामे घेरैत कहलनि, जे गरीब युवासँ रेलवेमे भर्तीक नाम पर जमीन लिखबा लैत अछि, ओ बिहारक भला नहिं कऽ सकैछ।
ओ मुख्यमंत्री नीतीश कुमारक प्रशंसा करैत कहलनि जे नीतीश कुमार रेल मंत्री सेहो छलाह मुदा आइ धरि कोनो शिकायत नहिं आयल अछि। पहिने खस्ताहाल ट्रेन चलैत छल, मुदा आइ वन्दे भारत चलि रहल अछि।
पीएम मोदी कहलनि जे आइ भारत दुनियाक पाँचम सबसँ पैघ अर्थव्यवस्था बनि गेल अछि। हमर चन्द्रयान आ तिरंगा चन्द्रमाक ओहि कोना धरि पहुँचल जतय कियो नहिं पहुँचल छल। जखन भारत जी-२० बैसार करैत अछि तखन एकर चर्चा पूरा दुनियामे होइत अछि। ई मोदी नहिं, अहाँसभ इ कयलहुँ। ई सब अहांक एक वोटसँ कएल गेल अछि। ई अहाँक मतक शक्ति अछि, तेँ जनता एहि सफलताक हकदार अछि।
पीएम मोदी जोर दैत कहलनि कि १० साल पहिने दुनियामे भारतक की राय छल, अहां सब जनैत छी। कांग्रेसक शासनकालमे भारतकेँ एकटा गरीब आ कमजोर देश मानल जाइत छल। पाकिस्तान दिस इशारा करैत ओ कहलनि जे आइ जे देश आंटाक लेल तरसि रहल अछि ओकर आतंकवादी हमरापर हमला करैत छल। कांग्रेसक सरकार एकर शिकायत आन देशमे लऽ जाइत छल, मुदा मोदी कहलक एना नहिं चलत।
प्रधानमंत्री मोदी कहलनि जे भारत महान पाटलिपुत्र आ मगधक देश अछि। ई चन्द्रगुप्त मौर्यक भारत अछि। आजुक भारत घरमे घुसि मारैत अछि।
जनसभामे प्रधानमंत्री स्वर्गीय रामविलास पासवानकेँ सेहो स्मरण कयलनि। ओ कहलनि जे आइ राम विलासक कमी खलि रहल अछि। ओ हमर सबसँ नीक दोस्त छलाह। हुनक विरासतकेँ हमर छोट भाय चिराग पासवान आगू बढ़ा रहल छथि।
लोकक भीड़केँ देखैत ओ कहलनि जे ई कोनो चुनावी सभा नहिं बल्कि विजय सभा अछि।
