अमेरिकी राष्ट्रपति डोनाल्ड ट्रम्प आ उपराष्ट्रपति जे.डी. वेंसक संग यूक्रेनक राष्ट्रपति वोलोदिमिर ज़ेलेंस्कीक गरमागरम बहस रूसी मीडिया द्वारा “नीक खबर”क रूपमे देखल जा रहल अछि। संगहि रूसक राष्ट्रपति व्लादिमीर पुतिनक संगी सेहो एहिसँ बहुत खुश छथि।
रूसी सुरक्षा परिषदक उप प्रमुख आ पूर्व राष्ट्रपति दिमित्री मेदवेदेव टेलीग्राम पर लिखलनि जे “अमेरिकी राष्ट्रपति यूक्रेनकेँ ‘कड़गर थप्पड़’ देलनि अछि, यद्यपि ई अपर्याप्त अछि – हमरासभकेँ नाजी मशीन (ज़ेलेंस्की सरकार) केँ सैन्य सहायता बंद करय पड़त।”
राज्य-नियंत्रित मीडिया ट्रम्प-ज़ेलेंस्की बैसारक विषयमे एक्स पर लिखलक: “ज़ेलेंस्की अपन दुनू पैरक बीच हाथ राखि बैसल छथि, जखन कि अमेरिकी राष्ट्रपति आ उपराष्ट्रपति हुनका पर निशाना साधि रहल छथि।”
रूसी विदेश मंत्रालयक प्रवक्ता मारिया जखारोवा कहलनि जे “ई एकटा ‘चमत्कार’ छल जे ट्रम्प आ उपराष्ट्रपति जे.डी. वेन्स जेलेंस्की पर हमला करबासँ अपनाकेँ रोकबामे सफल रहलाह।” ओ टेलीग्राम पर लिखलनि, “हमरा लगैत अछि जे ज़ेलेंस्कीक सबसँ पैघ झूठ व्हाइट हाउसमे हुनक दावा छल जे २०२२मे कीव शासन बिना कोनो समर्थनक असगर छल।”
एम्हर रूसी प्रत्यक्ष निवेश कोषक प्रमुख किरिल दिमित्रिएव ओवल ऑफिसमे भेल गरमागरम बहसकेँ “ऐतिहासिक” बतौलनि। दिमित्रिएव १८ फरवरीकेँ सऊदी अरबमे आयोजित रूसी-अमेरिकी वार्तामे मास्कोक वार्ताकारमे सँ एक छलाह।
व्हाइट हाउसमे ट्रंप-ज़ेलेंस्की झड़पक बाद, जतय अधिकांश यूरोपीय नेता ज़ेलेंस्की आ यूक्रेनक समर्थन कयलनि, ओतहि हंगरीक प्रधानमन्त्री विक्टर ओर्बन ट्रम्पक प्रशंसा करैत देखल गेलाह।
पुतिनक मित्र ओर्बनक अनुसार, ट्रम्प “शान्तिक लेल बहादुरीसँ ठाढ़ छथि। संभवतः बहुतो लोककेँ ई पचब मुश्किल होय।” ओ एक्स पर लिखलनि, “शक्तिशाली लोक शांति कायम करैत अछि, कमजोर युद्ध करैत अछि।”
रूसक अंतर्राष्ट्रीय मानवीय सहयोग एजेंसीक प्रमुख येवगेनी प्रिमाकोव टेलीग्राम पर लिखलनि, “सब कियो सब किछु देखलक। हम बस एहि दिसि ध्यान आकृष्ट करय चाहैत छी जे कीव शासनक प्रकृति की अछि : उकसावा, खूनी उकसावा। एखनि ज़ेलेंस्की आ हुनक सहयोगी उकसाबयमे रुचि रखैत छथि जाहिसँ शांतिपूर्ण नागरिकक सामूहिक मृत्यु भऽ सकैत छैक, किछु एहेन जे पहिने कहियो नहि भेल होय।”
एहिसँ पहिने शुक्रदिन ओवल ऑफिसमे अमेरिकी राष्ट्रपति डोनाल्ड ट्रम्प आ उपराष्ट्रपति जे.डी. वेन्सक सङ्ग राष्ट्रपति जेलेन्स्कीक बैसार हो-हल्लावाला गरमागरम बहसमे बदलि गेल।
अमेरिकी नेता लोकनि ज़ेलेंस्कीपर आरोप लगओलनि जे ओ अपन टिप्पणीक लेल व्हाइट हाउस आ अमेरिकाक अनादर कयलनि। एम्हर यूक्रेनक राष्ट्रपति हुनका सभपर आरोप लगओलनि जे ओ आक्रमणक शिकार होबय केर हताशाक अनुभव करबामे विफल रहलाह।
कोनो पक्ष कोनो समझौता पर हस्ताक्षर नहि कयलक। एहि समझौताक उद्देश्य कीवक युद्ध प्रयासमे कयल गेल सहायताक लेल यूक्रेनक दुर्लभ खनिज आ अन्य प्राकृतिक संसाधनसभ पर अमेरिकी अधिकार स्थापित करब छल।
