रूसक कामचटका क्षेत्रमे काल्हि बुधदिन भोरमे ८.७ तीव्रताक शक्तिशाली भूकंपक बाद प्रशांत महासागरक बहुत हिस्सामे सुनामीक खतरा बढ़ी गेल अछि। एहि स्थितिकेँ देखैत सैन फ्रांसिस्कोमे भारतीय महावाणिज्य दूतावास कैलिफोर्निया, हवाई आ अमेरिका केर अन्य पश्चिमी तटीय क्षेत्रमे रहय वला भारतीय नागरिक लेल सुरक्षा चेतावनी जारी कयलक। दूतावास सोशल मीडिया प्लेटफॉर्म एक्स पर पोस्ट करैत कहलक कि रूसमे ८.७ तीव्रताक भूकंपक बाद संभावित सुनामी खतरा पर नजरि राखल जा रहल अछि। कैलिफोर्निया, हवाई आ अन्य पश्चिमी तटीय क्षेत्रमे रहय वला भारतीय नागरिककेँ सतर्क रहय केर सलाह देल गेल अछि। दूतावास भारतीय नागरिकसँ स्थानीय प्रशासन, अमेरिकी आपातकालीन प्रबंधन एजेंसी आ अमेरिकी सुनामी चेतावनी केंद्रक सलाहक पालन करबाक अपील कयलक अछि। संगहि जँ सुनामीक चेतावनी जारी भऽ गेल तँ लोककेँ तटीय इलाकासँ दूर रहय केर चाही, ऊँच जगह पर जेबाक चाही, इमरजेंसी बैग तैयार राखय केर चाही आओर मोबाइल जेहन डिवाइसकेँ चार्ज राखय केर चाही। आपातकालीन संपर्ककेँ लेल हेल्पलाइन नंबर +1-415-483-6629 जारी कएल गेल अछि।
तहिना जापानमे प्रशासन सेहो पूर्ण सतर्क अछि। जापानक प्रधानमंत्री कार्यालय भोर 9:43 बजे (जीएसटी) एकटा निर्देश जारी कय अधिकारी सबसँ तत्काल कार्यवाही करय लेल कहलक अछि। निर्देशमे स्पष्ट कहल गेल अछि कि “सुनामीसँ जुड़ल जानकारी समय पर जनताकेँ उपलब्ध कराबय केर चाही आ स्थानीय निवासीकेँ सुरक्षा लेल सब संभव कदम उठायल जयबाक चाहि।
जापान मौसम एजेंसी (जेएमए) पूर्वी प्रशांत तट होक्काइडो आ अन्य तटीय क्षेत्र लेल सुनामीक चेतावनी जारी कयलक। एजेंसी नागरिक सबसँ अपन आधिकारिक वेबसाइट पर जा कय लहरक अनुमानित ऊंचाई आ आगमनक समय देखबा लेल कहलक अछि। एम्हर रूस आ ओकर पड़ोसी देशमे सेहो आपातकालीन सेवा हाई अलर्ट पर अछि। अधिकारी स्थानीय लोकसँ आग्रह करलनि अछि जे घबराऊ नहि बल्कि पूर्ण रूपसँ सतर्क रहू आ केवल विश्वसनीय स्रोतसँ भेटल आधिकारिक जानकारीक पालन करु।
वर्तमानमे पूरा प्रशांत क्षेत्रमे अलर्ट बढ़ा देल गेल अछि आ आपातकालीन टीम सक्रिय रूपसँ स्थिति पर नजरि राखि रहल अछि। स्थितिक गंभीरताकेँ देखैत सब संबंधित देश आपसी समन्वय बढ़ा देलक ताकि कोनो आपातकालीन स्थितिसँ निपटल जा सकय।
