यूक्रेनक राष्ट्रपति व्लादिमीर जेलेंस्की दावा कयलनि जे एकटा रूसी ड्रोन चेर्नोबिल परमाणु ऊर्जा संयंत्रक रिएक्टरक ऊपर स्थित रेडिएशन शेल्टरकेँ निशाना बनओलक। जेलेंस्की कहलनि जे रातिमे भेल हमलासँ संयंत्रक नष्ट भेल चारिम बिजली इकाईक छतमे आगि लागि गेल, जकरा बुझा देल गेल अछि। यूक्रेनक राष्ट्रपति कहलनि जे शुक्रदिन भोर धरि संयंत्रमे विकिरणक स्तर नहि बढ़ल छल। ज़ेलेंस्की एक्स पर वीडियो फुटेज पोस्ट कयलनि जाहिमे कंक्रीट आ स्टीलसँ बनल विशाल शील्डमे विस्फोट आ क्षति देखाओल गेल छल। ई ढाल रेडियोधर्मी पदार्थक रिसावकेँ रोकबाक लेल बनाओल गेल अछि। ई २७५ मीटर (९०० फीट) चौड़ा आ १०८ मीटर (३५४ फीट) ऊँच अछि आ एकर निर्माणमे १.६ अरब डॉलर खर्च भेल अछि।
संयुक्त राष्ट्रक परमाणु निगरानी संस्था अंतर्राष्ट्रीय परमाणु ऊर्जा एजेंसी (आईएईए) कहलक जे राति भेल विस्फोटक किछु मिनटक भीतर अग्नि सुरक्षा कर्मी आ वाहन प्रतिक्रिया देलक। एजेंसी कहलक जे कोनो हताहत होयबाक सूचना नहि अछि।
दुनिया भरिमे परमाणु सुरक्षाक निगरानी करयवला आई.ए.ई.ए. कहलक जे चेर्नोबिलक भीतर आ बाहर विकिरणक स्तर सामान्य आ स्थिर बनल अछि।
जनतब देब जे दुनियाक सबसँ पैघ परमाणु दुर्घटना २६ अप्रैल, १९८६ केर चेर्नोबिल रिएक्टरमे भेल छल। एकटा विनाशकारी विस्फोट रेडियोधर्मी सामग्रीक एकटा गुबार हवामे उड़ा देलक, जाहिसँ पूरा यूरोपमे सार्वजनिक स्वास्थ्य आपातकाल उत्पन्न भऽ गेल। यूक्रेन ओहि समय सोवियत संघक हिस्सा छल।
