रूस आ यूक्रेनक बीच संघर्ष शुरू भेलाकेँ दू सालसँ बेसी समय भऽ गेल अछि। दक्षिण कोरियाक जासूसक कहब छनि जे उत्तर कोरिया यूक्रेनक विरुद्ध रूसक युद्धमे सहायता लेल सैनिक पठा रहल अछि। एहिसँ रूस आ यूक्रेनक बीच चलि रहल संघर्ष बेसी विनाशकारी होयबाक सम्भावना बढ़ि गेल अछि। जनतब जे किछु मास पहिने रूसक राष्ट्रपति व्लादिमीर पुतिन उत्तर कोरियाक दौरा कयलनि आ उत्तर कोरियाक तानाशाहक सङ्ग बैसार सेहो कयलनि।
दक्षिण कोरियाक जासूसक अनुसार, उत्तर कोरिया यूक्रेनक सङ्ग युद्धमे रूसक मदति लेल १२,००० सैनिक पठौलक अछि। दक्षिण कोरियाक योनहाप समाचार एजेंसी राष्ट्रीय खुफिया सेवा (एनआईएस)क हवालासँ कहलक जे उत्तर कोरियाक सैनिक रूसक सहायता लेल पहिनेसँ चलि गेल अछि।
एहिसँ पहिने जूनक मासमे रूसक राष्ट्रपति व्लादिमीर पुतिन २४ सालक बाद उत्तर कोरियाक दौरा कयने छलथि। जतय उत्तर कोरियाक नेता किम-जोंग-उन प्योंगयांगक हवाई अड्डा पर व्लादिमीर पुतिनक स्वागत कयलनि। उत्तर कोरिया यूक्रेनमे अपन सैन्य कारवाईक लेल देशक दृढ़ समर्थनक सराहना कयने छल। ओतहि उत्तर कोरियाक राजधानी प्योंगयांगक सड़कसभकेँ पुतिनक उत्तर कोरियाई यात्राक लेल पुतिनक चित्र आ रूसी झण्डासँ सजाओल गेल छल।
