आ आब अमेरिकी राष्ट्रपति डोनाल्ड ट्रम्प रूसक राष्ट्रपति व्लादिमीर पुतिनकेँ सेहो धमकाबैत चेतौनी देलनि अछि। रूस-यूक्रेन युद्धकेँ रोकबाक लेल ३० दिनक युद्धविरामक प्रस्तावपर सहमत होयबाक लेल संयुक्त राज्य अमेरिका आ यूक्रेनक अधिकारीलोकनि मंगलदिन सऊदी अरबक जेद्दामे बैसार कयलनि। दुनू पक्षक बीच लगभग ८ घंटा धरि चलल बैसारमे अमेरिकी विदेश मंत्री मार्को रुबियो आ राष्ट्रीय सुरक्षा सलाहकार माइक वाल्ट्ज उपस्थित छलथि।
अमेरिकी युद्धविराम प्रस्तावपर यूक्रेनक समझौताक बाद अमेरिका यूक्रेनकेँ सैन्य सहायता आ खुफिया जानकारी पर लागल रोक हटा लेलक अछि। एहि प्रस्तावक विषयमे रूसक दिसिसँ एकटा बयान देल गेल अछि जे ओ अमेरिकी अधिकारीसभक एहि विषयमे पूर्ण जानकारी देबाक रुस प्रतीक्षा कऽ रहल अछि।
एम्हर डोनाल्ड ट्रम्प बुधदिन पुतिनकेँ चेतौनी देलनि जे जँ रूस युद्ध समाप्त करबाक लेल युद्धविरामक प्रस्तावपर सहमत नहि होइत अछि तँ ओकरा एकर परिणामक सामना करय पड़त। ट्रम्प स्पष्ट कयलनि जे एहेन स्थितिमे रूस पर पैघ प्रतिबन्ध लगाओल जा सकैत अछि।
ट्रम्प कहलनि, “हम रूसक संग एहेन काज कऽ सकैत छी जे रूसकेँ भारी नुकसान पहुँचा सकैत अछि। मुदा हम ओ नहि करए चाहैत छी। हम एहि युद्धमे शांति चाहैत छी। हमरा लगैत अछि जे हम एहि युद्धकेँ समाप्त करबाक समय करीब आबि रहल अछि आ हमरा आशा अछि जे हम बहुत जल्दी एहि युद्धकेँ समाप्त करबामे सक्षम होयब।”
व्हाइट हाउस सूचित कयलक अछि जे एहि सप्ताहान्तमे अमेरिकी अधिकारी स्टीव विटकॉफ रूसक यात्रा करताह। एहि अवधिमे, ओ रूसक राजधानी मॉस्कोमे रूसी अधिकारीसभक सङ्ग युद्ध समाप्त करबाक संबंधमे अमेरिकी युद्धविराम प्रस्तावपर चर्चा कऽ सकैत छथि।
