मंगलदिन विपक्ष राज्यसभा आ लोकसभाक दुनू सदनमे अपन मांगक संबंधमे नारा लगौलक। विपक्षी सांसद बिहारमे मतदाता सूचीमे विशेष संशोधनक मुद्दा पर चर्चा चाहैत छल। मुदा एहि लेल अनुमति नहि भेटलाक बाद विपक्षी सांसद नाराबाजी शुरू कय देलनि। एही कारण राज्यसभाक कार्यवाही कतेको बेर स्थगित करय पड़ल।
लोकसभामे सेहो एहने स्थिति छल। दुपहर 2 बजे सदन फेर शुरू भेला पर सेहो हंगामा जारी रहल। एकर बाद लोकसभा आ राज्यसभा दुनू सदन बुधदिन भोर धरि स्थगित भऽ गेल। दरअसल मंगलदिन भोरमे राज्यसभाक कार्यवाही शुरू भेलाक तुरंत बाद सदनमे भारी हंगामा देखल गेल। राज्यसभाक कार्यवाही शुरू भेला पर विपक्षी सांसद बिहारमे मतदाता सूचीक गहन समीक्षाक मुद्दा उठेलनि। विपक्षी सांसद चाहैत छलाह जे बिहार मतदाता सूचीक विशेष गहन संशोधन (एसआईआर) केर मुद्दा पर सदनमे विस्तृत चर्चा होए।
दोसर दिसि उपराष्ट्रपति जगदीप धनखड़ केर इस्तीफा पर चर्चाक मांग सेहो विपक्षक दिसिसॅं सदनमे उठल। मुदा एहि सबटा मांगकें सदन खारिज कय देलक। जकर बाद सदनमे हंगामा बढ़ि गेल आ कार्यवाही शुरू भेलाक मात्र 4 मिनट बाद राज्यसभा 12 बजे धरि स्थगित करय पड़ल।
कांग्रेस, राष्ट्रीय जनता दल, आम आदमी पार्टी, समाजवादी पार्टी आ तृणमूल कांग्रेस सहित अन्य विपक्षी दलक सांसद बिहार मतदाता सूचीक गहन समीक्षाक मुद्दा पर चर्चा लेल उपाध्यक्षकें नोटिस दऽ चुकल छलाह। ई नोटिस नियम 267 केर तहत देल गेल छल।
उपाध्यक्ष एहि नोटिसकें खारिज कय देलनि। एकर बाद विपक्षी सांसद अपन सीटसॅं उठि कय नारा लगाबैत आगू बढ़लाह। सदनमे बढ़ैत हंगामाकें देखैत सदनक कार्यवाही स्थगित कय देल गेल।
एहिसॅं पहिने उपाध्यक्ष सदनमे कहलनि, हुनका नियम 267 केर तहत चर्चाक लेल कुल 12टा नोटिस भेटल अछि। ई सभ नोटिस खारिज कय देल गेल। बिहार मतदाता सूची समीक्षा मामिलामे विपक्षी सांसद सैयद नासिर हुसैन, अखिलेश प्रसाद सिंह, रंजीत रंजन, नीरज डांगी, अशोक सिंह, मनोज कुमार झा आ रामजी लाल सुमन आदि चर्चा लेल नोटिस देने छलाह।
विपक्षी सांसद संतोष कुमार पी. उपाध्यक्ष आ राज्यसभा अध्यक्ष जगदीप धनखड़ केर अचानक इस्तीफा पर चर्चाक मांग करैत नोटिस देने छलाह। कुर्सी पर बैसल उपाध्यक्ष हरिवंश नियम 267 केर संबंधमे पुरान फैसलाक हवाला दैत कहलनि जे इ सबटा नोटिस खारिज भऽ गेल अछि। एकर बाद विपक्षी सांसद सभ तमसा गेलाह आ नाराबाजी करय लगलाह। कांग्रेस, समाजवादी पार्टी, डीएमके, आप, आम आदमी पार्टी आ राष्ट्रीय जनता दल सहित विभिन्न विपक्षी दलक सांसद अपन सीटसॅं उठि नारा लगाबैत आगू आबि गेलाह।
ई सांसद राज्यसभा उपाध्यक्षसॅं मांग कय रहल छलाह जे बिहार मतदाता सूचीक मुद्दा पर तत्काल चर्चा होए। आक्रोशित सांसद अपन मांगक नारा लगाबैत रहलाह। हंगामा बढ़ैत देखि उपसभापतिकेँ सदनक कार्यवाही 12 बजे धरि स्थगित करय पड़लनि।
12 बजे सदनक कार्यवाही शुरू भेला पर सेहो हंगामा जारी रहल आ किछुए देर बाद सदनक कार्यवाही 2 बजे धरि स्थगित भऽ गेल। दुपहर २ बजे स्थिति ओहिना रहल जाहि कारणे सदन दिनक लेल स्थगित भऽ गेल।
उल्लेखनीय अछि जे सोमदिन राति राज्यसभाक अध्यक्ष आ उपराष्ट्रपति जगदीप धनखड़ स्वास्थ्य कारण बतौलनि आ अपन पदसँ इस्तीफा दऽ देलनि। जगदीप धनखड़ केर इस्तीफाक बाद आब राज्यसभाक कार्यवाही उपाध्यक्ष द्वारा संभारल जा रहल अछि।
