प्रधानमंत्री नरेन्द्र मोदी प्रसिद्ध अमेरिकी पॉडकास्टर लेक्स फ्रिडमैनसँ लम्बा बातचीत कयलनि। एहिमे पीएम मोदी अपन बचपनसँ सार्वजनिक जीवन धरिक यात्रा सहित विभिन्न मुद्दा पर चर्चा कयलनि।
प्रधानमंत्री नरेन्द्र मोदी लेक्स फ्रिडमैन पॉडकास्टमे आरएसएसक संग अपन जुड़ावक चर्चा कयलनि। ओ कहलनि, “हम अपनाकेँ भाग्यशाली मानैत छी जे आरएसएस सन प्रतिष्ठित सङ्गठनसँ जीवनक सार आ मूल्य सीखलहुँ। हमरा एकटा उद्देश्यपूर्ण जीवन भेटल।
पीएम मोदी कहलनि जे हुनका बचपनमे आरएसएसक सभामे भाग लेबामे हरदम मजा अबैत छलनि। हुनक मोनमे हरदम एकटा लक्ष्य छल, देशक सेवा करब। ‘संघ’ (आरएसएस) हुनका इएह सिखओलक। आरएसएस एहि साल 100 साल पूरा कए रहल अछि। आरएसएससँ पैघ कोनो ‘स्वैच्छिक संगठन’ दुनियामे नहि अछि। आरएसएसकेँ बुझनाइ आसान काज नहि अछि। एकरा एकर काजसँ बुझबाक चाही। ई अपन सदस्यसभकेँ जीवनक एकटा उद्देश्य दैत अछि। ई सिखाबैत अछि जे राष्ट्र सब किछु अछि आ सामाजिक सेवा भगवानक सेवा अछि। हमर वैदिक संत आ स्वामी विवेकानन्द जे सिखबैत छलाह सेहो संघ द्वारा सिखाओल जाइत अछि।
ओ कहलनि, आर.एस.एस.क किछु सदस्य शिक्षामे क्रांति अनबाक लेल ‘विद्या भारती’ नामक एकटा सङ्गठन शुरू कयलनि। ओ सभ देश भरिमे लगभग २५,००० विद्यालय चलबैत छथि, जाहिमे एक समयमे ३० लाख छात्र एहि विद्यालयसभमे पढ़ैत छथि। वामपंथी लोकनि द्वारा प्रचारित श्रमिक आन्दोलन ‘दुनियाक मजदूर, एकजुट होउ!’क नारा लगबैत अछि, जखनि कि आरएसएसक श्रम संगठन ‘श्रमिक, दुनियाकेँ एकजुट करू!’क नारा लगबैत अछि।
लेक्स फ्रिडमैनक सङ्ग पॉडकास्टमे पीएम मोदी खुलि कऽ अपन आलोचनाक चर्चा कयलनि। ओ कहलनि जे ओ आलोचनाक स्वागत करैत छथि, दृढ़ विश्वास रखैत छथि जे ई लोकतंत्रक सार अछि।
एहि दौरान ओ पाकिस्तानक बारेमे सेहो बात कयलनि। प्रधानमंत्री कहलनि जे हमरा आशा अछि जे पाकिस्तानकेँ नीक बोध होयत आ शान्तिक मार्ग चुनत। प्रधानमंत्री कहलनि जे पाकिस्तानक जनता सेहो शान्ति चाहैत अछि। हम अपन शपथ ग्रहण समारोहमे पाकिस्तानकेँ एकटा नव अध्याय शुरू करबाक लेल आमंत्रित कयने छलहुँ, मुदा शान्तिक प्रत्येक प्रयासकेँ शत्रुता आ विश्वासघातक सामना करय पड़ल अछि। पीएम मोदी कहलनि जे जखन जखनि हम शान्तिक बात करैत छी तखनि दुनिया हमर बात सुनैत अछि किएक तँ भारत गौतम बुद्ध आ महात्मा गाँधीक भूमि अछि।
ओ कहलनि, हमर ताकति हमर नाम पर नहि बल्कि १.४ अरब भारतीयमे अछि। पीएम मोदी लेक्स फ्रिडमैन पॉडकास्टमे कहलनि जे जखनि हम विश्व नेतासँ हाथ मिलाबैत छी तखनि मोदी नहि बल्कि १.४ अरब भारतीय एहेन करैत छथि। ओ कहलनि जे हमर शक्ति हमर नाम पर नहि अपितु १.४ अरब भारतीयक समर्थन आ देशक कालातीत संस्कृति आ धरोहरमे अछि।
जनतब जे लेक्स फ्रिडमैन पछिला मास पीएम मोदीक साक्षात्कार लेबाक लेल भारत आयल छलाह। अपन यात्रासँ पहिने ओ घंटाक धरि पीएम मोदीक सङ्ग विभिन्न विषय पर चर्चा करबाक आनन्द आ उत्सुकता व्यक्त करैत कहलनि जे पीएम मोदी सबसँ आकर्षक व्यक्तिमेसँ एक छथि जिनका विषयमे ओ एखनी धरि पढ़ने छथि।
