कांग्रेस नेता राहुल गांधी आरोप लगौलनि अछि जे राष्ट्रीय स्वयंसेवक संघ आ माकपा जनताक बारेमे नहि सोचैत अछि। ओ कहलनि, जॅं कियो जनताक बारेमे नहि सोचैत अछि आ ओकरासॅं जुड़बामे सक्षम नहि अछि तखनि ओ नेता नहि बनि सकैत अछि। शुक्रदिन केरलक कोट्टायममे राज्यक पूर्व सीएम ओमान चांडीक दोसर पुण्यतिथिक आयोजनमे राहुल गांधी शामिल भेलाह।
राहुल गांधी कहलनि जे हमरा संघ आ माकपासॅं वैचारिक लड़ाई अछि, मुदा हमर सबसॅं पैघ शिकायत अछि जे ओ जनताक बारेमे नहि सोचैत छथि। जनताक प्रति हुनका कोनो भाव नहि छनि। राहुल गांधी कहलनि जे इ हमर सबसॅं पैघ शिकायत अछि जे जॅं अहां राजनीतिमे छी तॅं लोकक विचार बुझबाक चाही। हुनकर बात सुनु आ हुनका तक पहुंचबाक प्रयास करू। मुदा भारतीय राजनीतिक त्रासदी ई अछि कि आई बहुत कम एहेन लोक छथि जे वास्तवमे दोसरक भावनाक चिंता करैत छथि।
प्रवर्तन निदेशालय हरियाणाक शिकोहपुरमे जमीनक सौदामे कथित गड़बड़ीसॅं जुड़ल मनी लांड्रिंगक मामिलामे रॉबर्ट वाड्राक खिलाफ आरोप पत्र दायर कयलक अछि। एहि संबंधमे राहुल गांधी सरकारकें निशाना बनेलनि। ‘एक्स’ पर शेयर कएल गेल पोस्टमे ओ कहलनि जे, हमर जीजा पिछला 10 सालसॅं एहि सरकारसॅं परेशान भऽ रहल छथि। ई ताजा आरोप पत्र ओही उत्पीड़न अभियानक एकटा आओर हिस्सा अछि। हम रॉबर्ट, प्रियंका आ हुनकर बच्चा सबहक संग ठाढ़ छी, जखनि कि हुनका सबकेँ एकटा आओर दुर्भावनापूर्ण, राजनीतिक रूपसॅं प्रेरित हमलाक सामना करय पड़ल अछि। हमरा बुझल अछि जे ओ सब एतेक बहादुर छथि जे कोनो तरहक परेशानीक सामना कय सकैत छथि। साहस आ मर्यादाक संग करैत रहताह। लोकसभामे विपक्षक नेता कहलनि जे, अंततः सत्य हावी होयत।
