समस्तीपुरमे पेट्रोलिंग ड्यूटी करैत आरपीएफ जवानक ट्रेनक चपेटमे आबि मृत्यु

समस्तीपुर समदिया
*

समस्तीपुरमे बगहा पूर्व मध्य रेलवेक समस्तीपुर डिवीजनक नरकटियागंज चौकी पर सोमदिन दर्दनाक हादसामे भोरे गश्ती ड्यूटी पर तैनात ४९ वर्षीय कांस्टेबल बादशाह सिंहक ट्रेनक चपेटमे आबि मृत्यु भऽ गेल। प्राप्त जानकारीक अनुसार पूर्वी चम्पारण जिलाक पवनवा थाना क्षेत्रक बिलासपुर गामक निवासी छलथि आरक्षी बादशाह सिंह। जखन ई घटना हुनका सङ्ग भेल तखन ओ सभ ओएचई तार आ सामग्रीक रक्षाक लेल हरिनगरसँ भैरोगगंजक बीच गश्त ड्यूटी पर छलाह।

सोमदिन भोर लगभग ६:०० बजे, हरिनगर-भैरोगगंजक बीच गेट नंबर ३६बी, किलोमीटर संख्या २६८/३-५ पर, जखन ओ सभ अप लाइन पर ठाढ़ छलाह तखन अचानक ट्रेन नंबर ०५४९७ सs टकरा गेलाह। हुनकर मौकापर दुखद मृत्यु भऽ गेलनि। जानकारीक अनुसार आरपीएफ पुलिस शव लऽ कऽ पोस्टमार्टम लेल अनुमंडलीय अस्पताल बगाहा पठौलक अछि। मामिलाक जांच कएल जा रहल अछि। रेलवे आरपीएफ डीएसपी एमके सिसोदिया कहलनि जे शवकेँ हिरासतमे लऽ कऽ पोस्टमार्टम लेल अनुमंडलीय अस्पताल बगाहा पठाओल गेल अछि। ओ बतौलनि जे ई घटना गश्त केर दौरान भेल छल। वर्तमानमे हुनक परिवारक सदस्यसभकेँ एहि बातक जानकारी देल गेल अछि। रेलवे प्रशासन द्वारा एहि मामिलाक गहन जाँच कयल जा रहल अछि।