बिहारमे विपक्ष लगातार कानून व्यवस्थाकेँ लऽ कऽ सरकार केर घेरि रहल अछि। बुधदिन गोपालगंज जिलाक मांझा थाना क्षेत्रमे दिनदहाड़े ज्वेलरी दुकानकेँ निशाना बना कय डकैत 10 सँ 12 लाख रुपैयाक नगद आ गहना लूटैत भागि गेल।
एहि दौरान ओ गोली सेहो चला देलक। पुलिसक अनुसार मांझा थाना क्षेत्रक धर्मपर्सा बाजारमे स्थित राजू सोनीक गहनाक दोकान पर आठसँ दस अपराधी बाइकसँ पहुंचल। कहल गेल जे दोकान पर पहुँचैत देरी अपराधी लॉकरक चाभी मांगय लागल।
विरोध पर गोलीबारी शुरू कय 20 सँ 30 हजार नगदीक संग-संग दोकानसँ सोना-चांदीक लूटपाट कय भागि गेल। अनुमानक अनुसार करीब 10 सँ 12 लाख रूपयाक गहना लूटल गेल अछि।
घटनाक जानकारी भेटैत देरी मांझा थानाक संग सारण रेंजक डीआईजी नीलेश कुमार, गोपालगंजक एसपी अवधेश दीक्षित आ सिवानक एसपी मनोज तिवारी सेहो मौका पर पहुंचि मौकाक निरीक्षण कय जांच पुलिस टीमकेँ जरूरी निर्देश देलनि।
एम्हर, घटनाक सीसीटीवी फुटेज सेहो सामने आयल अछि, जाहिमे अपराधी सभक हरकत कैद कएल गेल अछि। गोपालगंजक पुलिस अधीक्षक अवधेश दीक्षित कहलनि जे, मामिलाक जांच आ अपराधीक गिरफ्तार करय लेल विशेष जांच टीमक गठन कयल गेल अछि। ओ आश्वासन देलनि जे जल्दिये अपराधीकेँ गिरफ्तार कय मामिलाक खुलासा होयत।
