केन्द्रीय सड़क परिवहन आ राजमार्ग मंत्री नितिन गडकरी कहलनि जे सड़क सुरक्षाक लेल तत्काल नीक उपायक आवश्यकता अछि। ओ सड़क निर्माण उद्योगसँ आग्रह कयलनि जे नव प्रौद्योगिकी आ टिकाऊ पुनर्नवीनीकरण योग्य निर्माण सामग्री अपनबैत सड़क सुरक्षा बढ़यबाक रणनीति विकसित कयल जाय। केन्द्रीय मंत्री जोर देलनि, “सड़क सुरक्षा पर ध्यान देबाक सङ्ग सरकारक लक्ष्य २०३० धरि दुर्घटनाक दरकेँ ५० प्रतिशत कम करब अछि।”
राष्ट्रीय राजधानीमे दू दिवसीय ‘ग्लोबल रोड इन्फ्राटेक समिट एंड एक्सपो (जीआरआईएस)’मे केन्द्रीय मंत्री उल्लेख कयलनि जे देशमे अधिकांश सड़क दुर्घटना सड़क डिजाइन, निर्माण आ प्रबंधनमे खराब सिविल इंजीनियरिंग प्रैक्टिस आ सड़क संकेत एवं मार्किंग सिस्टमक कारण होइत अछि। मंत्री गडकरी सुझाव देलनि जे स्पेन, ऑस्ट्रिया, आ स्विट्जरलैंड सन देश की कऽ रहल अछि से देखि सुधार कयल जा सकैत अछि।
भारतमे ४८०,००० सड़क दुर्घटना भेल अछि, जकर परिणामस्वरूप १,८०,००० लोकक मृत्यु भेल अछि आ लगभग ४००,००० लोक गम्भीर रूपसँ घायल भेल अछि। एहिमेसँ १,४०,००० दुर्घटनामे १८-४५ वर्षक लोक सम्मिलित छथि, जाहिमे अधिकांश दुपहिया सवारसभ आ पैदल यात्री प्रभावित छथि।
गडकरी कहलनि, “एहि दुर्घटनासभसँ सकल घरेलू उत्पादकेँ ३ प्रतिशतक आर्थिक क्षति होइत अछि।”
सड़कक खराब योजना आ डिजाइनक कारण सड़क दुर्घटनामे वृद्धिक लेल मुख्य रूपसँ अभियन्तासभकेँ जिम्मेदार ठहराबैत केन्द्रीय मंत्री घटिया विस्तृत परियोजना रिपोर्ट (डीपीआर) दिसि सेहो इशारा कयलनि।
ओ कहलनि, “सड़क सुरक्षाकेँ प्राथमिकता दऽ कऽ सरकारक लक्ष्य २०३० धरि दुर्घटनाक दरकेँ ५० प्रतिशत कम करब अछि।” गडकरी उद्योग आ सरकारसँ सड़क दुर्घटनाकेँ रोकबाक लेल समाधान तकबामे सहयोग करबाक आग्रह कयलनि। ओ सुरक्षित बुनियादी ढाँचाक निर्माण आ सुरक्षित ड्राइविंग आदतिक विषयमे जागरूकता बढ़यबामे शिक्षाक महत्वपर सेहो जोर देलनि।
एहि सम्मेलनक आयोजन इनोवेशन अर्थात नवाचारकेँ प्रेरित करबाक, उद्योग प्रदातासँ अत्याधुनिक समाधानक प्रदर्शन करबाक, ज्ञानक आदान-प्रदानकेँ बढ़ावा देबाक लेल, आ सरकारी निकाय आ निजी सङ्गठनक विशेषज्ञ आ निर्णय लेनिहारक लेल बहुमूल्य नेटवर्किंगक अवसर खोलबाक लेल कयल गेल छल।
