राष्ट्रीय लोक जनशक्ति पार्टी (आरएलजेपी) आगामी बिहार विधानसभा चुनावमे सभ 243 सीट पर अपन उम्मीदवार ठाढ़ करत। पार्टी जमीनी स्तर पर संगठन आ दलित सशक्तिकरण पर ध्यान केन्द्रित करैत २०२५क चुनावक लेल अपन तैयारी सेहो तेज कऽ देलक अछि।
पशुपति कुमार पारस कहलनि, “हमसभ बिहारक प्रत्येक बूथ पर एकटा संगठन स्थापित करबाक योजना बनौने छी। तदनुसार, सभ निर्वाचन क्षेत्रमे बूथ स्तरीय अधिकारी (बीएलओ) नियुक्त कयल जायत। बिहारक सभटा २४३ सीटपर चुनाव लड़बाक लेल जमीनी स्तर पर एकटा मजबूत आधार बनेबाक विचार अछि।
पशुपति पारस इहो घोषणा कयलनि जे अप्रैल २०२५ धरि सभ विधानसभा क्षेत्रमे कार्यकर्ता सम्मेलन आयोजित कयल जायत। दोसर दिसि, आरएलजेपीक दलित शाखाक दलित सेना १४ अप्रैलकेँ पटनामे बाबा साहेब भीमराव अम्बेडकरक जयंती मनाओत। दलित मुद्दा पर आरएलजेपीक ध्यानकेँ उजागर करैत पूरा बिहारमे दलित सेनाक कार्यकर्ता जमा होयत।
आरएलजेपीक प्रदेश अध्यक्ष प्रिंस राज सभ पदाधिकारी आ जिला अध्यक्षकेँ निर्देश देलनि अछि जे ओ अपन निवास पर पार्टीक झण्डा आ नेमप्लेट लगाबथि। कार्यकर्ता सभकेँ आश्वासन देल गेल अछि जे विधानसभा चुनावमे आरएलजेपी द्वारा मजबूत उम्मीदवार उतारल जायत।
उल्लेखनीय अछि जे २०२४क लोकसभा चुनावसँ पहिने आरएलजेपी एनडीए गठबंधनक हिस्सा छल आ पशुपति कुमार पारस प्रधानमंत्री नरेन्द्र मोदीक सरकारमे कैबिनेट मंत्री छलाह। मुदा, लोकसभा चुनावक दौरान आरएलजेपीकेँ बिहारमे सीट नहि देल गेल छल, जाहिसँ दरार पड़ल। चिराग पासवान एनडीएमे शामिल भऽ गेलाह, जखनि कि पशुपति पारस एहिसँ दूरी बना लेलनि।
जनवरीमे पटनामे मकर संक्रांति चूरा-दही भोजक दौरान पशुपति कुमार पारस मुख्यमंत्री नीतीश कुमार आ राजद प्रमुख लालू प्रसाद यादवके आमंत्रित कयलथि। लालू प्रसाद यादव अपन बेटा तेज प्रताप यादवक संग पारसक निवास पर आयोजित कार्यक्रममे भाग लेलनि, जाहिसँ आरएलजेपीक महागठबंधनमे शामिल होयबाक अटकलबाजी तेज भऽ गेल। पारस स्वयं संकेत देलनि जे गठबंधनक निर्णय चुनावक नजदीक कयल जायत। आरएलजेपी केर सभटा २४३ सीटपर स्वतंत्र रूपसँ चुनाव लड़ब एनडीए आ महागठबंधन दुनू लेल चुनौती बनि सकैत अछि।
