अमित शाहक बिहार दौरासँ पहिने सियासत पर दिलीप जायसवाल कहलनि जे सहयोगी दल सभसँ एहिमे सीट शेयरिंग पर चर्चा नहि होयत। ई तय अछि जे नीतीशक नेतृत्वमे एनडीए चुनाव लड़त।
केंद्रीय गृहमंत्री अमित शाहक बिहार दौराक खबरिसँ सियासी गर्माहट बढ़य लागल अछि। आरजेडीक बयानक बाद जुबानी जंग तेज भ’ गेल अछि। आरजेडी नेता शक्ति यादव इ दावा कयलनि जे बीजेपी बिहारमे सत्ता हस्तांतरणक पूर्ण तैयारी क’ लेने अछि, तें शाह बिहार आबि रहल छथि। विधानसभा चुनाव धरि बीजेपी अपन मुख्यमंत्री बनाबय चाहैत अछि।
एही पर आब बिहार बीजेपीक प्रदेश अध्यक्ष दिलीप जायसवाल पलटवार कयलनि।
दिलीप जायसवाल शनिदिन (29 मार्च, 2025) कहलनि जे आरजेडी लग आर किछु काज नहि अछि। हुनकर प्रयास रहैत अछि जे हमर काजमे बाधा उत्पन्न कएल जाए। दोसरक घरमे केना विघ्न डालल जाए, एहीमे आरजेडी लागल रहैत अछि। आरजेडी वला बेरोजगार अछि।
ओ प्रश्न उठबैत कहलनि जे हमरा एहीठाम कि होयत, ई आरजेडी केना तय करत ?
बीजेपी नेता दिलीप जायसवाल कहलनि जे चुनावी वर्षमे अमित शाहक ई बहुत महत्वपूर्ण दौरा अछि। आइ (शनिक) राति ओ प्रदेश कार्यालयमे विधायक-सांसद आ प्रदेश पदाधिकारिक संग महत्वपूर्ण बैठक करताह। एहिमे संगठनक मजबूती आ आगामी विधानसभा चुनावक रणनीति पर चर्चा होयत। एहिकेँ बाद सभ लोकसँ सुझाव सेहो लेल जायत। एकरा बाद शाह बिहार बीजेपी कोर ग्रुप संग बैठक करथिन जे पॉलिसी तय करैत अछि।
दिलीप जायसवाल बतौलन्हि जे रविकेँ पटनामे बापू सभागारमे सहकारिता आंदोलनसॅ जुरल लोक सभकेँ अमित शाह संबोधित करथिन। ओकर बाद ओ गोपालगंज जयताह। ओतय बदलैत बिहार पर चर्चा होबयवला विशाल रैली अछि जे ओ संबोधित करथिन। रविक सांझ ओ पटनामे सीएम आवास पर प्रमुख नेता सभसँ भेट करताह आ तकर बाद दिल्ली रवाना हेताह।
बिहार बीजेपी अध्यक्ष बतौलन्हि जे अमित शाहक बिहार दौर’क दौरान कतहुँ सहयोगी दल सभसँ सीट शेयरिंग पर चर्चा नहि होयत । सीट शेयरिंग पर चर्चा ततय होइत अछि जतय सभ सहयोगी दलक राष्ट्रीय नेतृत्व बैसैत अछि। ई निश्चित कयल गेल अछि जे नीतीश केर नेतृत्वमे एनडीए विधानसभा चुनाव लड़त। सभ 243 सीट जीतब एनडीए केर लक्ष्य अछि।
