केंद्रीय मंत्री आ भाजपाक वरिष्ठ नेता नित्यानंद राय कहलनि, एकटा राजद नेता ‘भूरा बाल साफ करो’ केर नारा देलनि। राजद अध्यक्ष लालू यादव सेहो ई नारा देने छलाह। ई नारा सामाजिक उन्माद उत्पन्न करैत आबि रहल अछि। एहि नाराक कारणे हुनक समयमे समाजमे झगड़ा आ हिंसा होइत छल । आइ सामाजिक समरसता अछि। एनडीए सबहक विकास कय रहल अछि।
पटनामे पत्रकारसँ गप करैत केंद्रीय मंत्री नित्यानंद राय विपक्षक ‘वोट चोरी’ केर आरोप पर कहलनि जे विपक्षकेँ खुद चोरी करबाक आदति अछि। ओ कहलनि जे, विपक्ष पहिने अलकतरा घोटाला, चारा घोटाला, दवाई आ वर्दी घोटाला कयने अछि। ओ चुटकी लैत कहलनि जे विपक्षकेँ चोरी करय लेल स्वतंत्र रहबाक चाही, एतय केकरो मंशामे कोनो कुनीयत नहि अछि आ हमर सबहक मंशा साफ अछि।
बिहारमे आपराधिक घटना पर विपक्ष द्वारा उठाओल जा रहल सवाल पर ओ कहलनि जे अपराध कोनो समय होइत अछि तऽ ई दुखद। मुदा, पहिने अपराधीकेँ बचायल जाइत छल, मुदा आब कोनो अपराध भेला पर कार्यवाही कयल जाइत अछि। अपराधीकेँ पकड़िकेँ सजा देल जाइत अछि। पहिने मुख्यमंत्री आ मंत्रीक घरमे अपराधीक संबंधमे बैसार होइत छल, मुदा आब सरकारक इरादा बिहारमे कानूनक राज कायम रखबाक अछि। ओ कहलनि जे, जनता राजदकेँ खारिज कय चुकल अछि।
महाराष्ट्रमे जारी भाषा विवाद पर नित्यानंद राय कहलनि जे भाजपा सब भाषाक सम्मान करैत अछि। एहि देशमे बहुत रास भाषा अछि। प्रधानमंत्री नरेंद्र मोदी जी कतेको भाषामे ज्ञान आ विज्ञानक बात कयलनि। हिन्दी देशक राजभाषा अछि आ सभ भाषाक सम्मान, संरक्षण आ प्रचार-प्रसार भ’ रहल अछि । केंद्र सरकार सब भाषाक सम्मान करैत अछि। ई देशक सौन्दर्य थिक।
18 जुलाईकेँ प्रधानमंत्री नरेंद्र मोदीक बिहारक मोतिहारीक प्रस्तावित यात्राक संबंधमे राय कहलनि जे जखनि कखनो पीएम मोदी बिहार अबैत छथि तऽ राज्यकेँ बहुत पैघ उपहार भेटैत अछि। एक बेर फेर पीएम मोदी बिहार आबि रहल छथि। बुनियादी ढांचाक निर्माणसँ लोककेँ रोजगार भेटैत अछि। एहि ठामक लोक अपन प्रधानमंत्रीक प्रतीक्षामे अछि।
